Chempıondyq tájdiń taǵdyry sońǵy 26-týrda sheshildi. Sheshýshi oıyndy tamashalaýǵa jankúıerler Almatydaǵy Ortalyq stadıonǵa kóptep jınaldy. Matchtyń 15-mınýtynda qonaqtar esep ashty. Nazmı Grıpshıdiń bergen pasyn Martın Tomasov qaqpaǵa dóp túsirdi – 0:1. Odan keıin alań ıeleri janushyra alǵa umtyldy. Astanalyqtar da qalyspady. Olardyń da esepti eseleýge birneshe múmkindigi boldy. Biraq elordalyq fýtbolshylardyń ár shabýylyna «Qaırattyń» qorǵaýshylary toıtarys berdi.
Úzilisten soń Rafael Orazbahtınniń shákirtteri basymdyq tanyta bastady. Sondaı bir qarqyndy shabýyldyń aqyry Dastan Sátpaevtiń ádemi gol soǵýymen aıaqtaldy – 1:1. Teń oıyn basty qarsylasynan eki upaı alda turǵan «Qaıratty» qanaǵattandyratyn edi. Sodan keıin «Astananyń» oıynshylary tegeýirinin kúsheıtip, jıi alǵa umtyldy. Alaıda óte saýatty qorǵanǵan almatylyqtar teń esepti saqtap qaldy.
Sóıtip, 59 upaıdy qorjynǵa salǵan «Qaırat» qatarynan ekinshi jyl el chempıony atandy. Chempıonnan eki upaı kem jıǵan «Astana» kúmis medaldy ıelense, «Tobyl» qola júldeni oljalady. Qostanaılyq klýb 54 upaı jınady. Odan keıingi oryndarǵa myna komandalar jaıǵasty: 4. «Elimaı» (48 upaı), 5. «Aqtóbe» (43), 6. «Jeńis» (36), 7. «Ordabasy» (35), 8. «Oqjetpes» (35), 9. «Qyzyljar» (27), 10. «Ulytaý» (23), 11. «Qaısar» (22), 12. «Jetisý» (21), 13. «Atyraý» (19), 14. «Turan» (16).
