Úkimet basshysy buqaralyq sportty damytý baǵytynda atqarylyp jatqan jumystarǵa toqtaldy.
«Memleket basshysy Qasym-Jomart Toqaev buqaralyq sportty damytýǵa erekshe kóńil bóledi. Ústel tennısi buqaralyq sport qozǵalysyn qalyptastyrýǵa jáne salamatty ómir saltyn nasıhattaýǵa eleýli úles qosady», dep atap ótti O.Bektenov.
Elimizde búginde 260 myńnan astam adam ústel tennısimen turaqty túrde aınalysady. Al salada 10 myńnan astam kásibı sportshy men 400-ge jýyq jattyqtyrýshy jumys isteıdi.
El kóleminde 20 óńirlik federasııa bar, 12 zamanaýı ústel tennısi ortalyǵy, 30 jańa bólimshe jáne 35 mamandandyrylǵan zal ashylǵan.
Sportshylarymyz halyqaralyq arenalarda tabysty óner kórsetip júr. Keıingi eki jylda olar 85 medal jeńip aldy, onyń 31-i – altyn. Olardyń arasynan Olımpıada oıyndarynyń qatysýshysy Kırıll Gerasımenkony, jastar arasyndaǵy álem chempıony Alan Qurmanǵalıevti, halyqaralyq týrnırlerdiń jeńimpazdary Záýresh Akasheva jáne Sarvınoz Mırkadırovalardy erekshe atap ótý kerek.
2023 jyly Astanada alǵash ret ústel tennısinen Azııa chempıonaty ótken edi. Endi 2027 jyly Qazaqstanda álem chempıonatyn ótkizý josparlanyp otyr.
Premer-mınıstr Prezıdent kýbogine arnap týrnır ótkizý otandyq sportty álemdik deńgeıge kóterý maqsatyndaǵy mańyzdy qadam ekenin jáne munda Qazaqstan men shetelderdiń myqty tennısshileri bas qosatynyn atap ótti.
Ashylý saltanatynda Halyqaralyq ústel tennısi federasııasynyń bas hatshysy Raýl Kalın de sóz sóıledi. Ol Qazaqstannyń táýelsizdik jyldaryndaǵy damýyna, eldiń sportty damytýǵa qosqan úlesine oń baǵa berdi, sondaı-aq Prezıdent Qasym-Jomart Toqaevqa ústel tennısine qoldaý kórsetip kele jatqany úshin alǵysyn bildirdi.
