Memleket basshysynyń tapsyrmasyna sáıkes Energetıka mınıstrligi Sıfrlyq transformasııa kartasyn bekitti. Qujatta Smart Grid júıesin, sıfrlyq egizder men jasandy ıntellektke negizdelgen monıtorıng pen boljaý tehnologııalaryn engizý josparlanǵan. Qazirgi tańda 43 memlekettik qyzmettiń 99 paıyzy onlaın kórsetiledi, al 2027 jylǵa qaraı nysandardyń jartysy sıfrlyq monıtorıngke kóshpek.
Elektr jelilerin tekserý endi drondar men jasandy ıntellekt júıesi arqyly júzege asady. Olar symdardyń zaqymdanýy men qyzýyn anyqtap, energetıkalyq jeliniń sıfrlyq egizin jasaıdy. Bul apat qaýpin azaıtyp, energııa shyǵynyn tómendetedi.
Jylý energetıkasynda da robottandyrylǵan keshender engizilip jatyr. Robottar qubyr ishindegi aqaýlardy anyqtap, úsh ólshemdi model jasaıdy. Joba Shymkentte synaqtan ótkizilip jatyr, nátıjesi oń bolsa, el boıynsha keńeıtiledi.
Innovasııalar ortalyǵy – Astana Hub. Munda energetıkalyq startaptar damyp keledi. 2024 jyly tehnopark rezıdentteriniń tabysy 1,8 mlrd teńgege jetip, 400-den astam jańa jumys orny ashylǵan. Máselen, FACEPLATE platformasy KEGOC kompanııasyna 1,6 mln dollar únem ákelse, ESEP sheshimderi kommýnaldyq resýrstardy 12 paıyzǵa azaıtýǵa múmkindik berdi.
Halyqaralyq tájirıbe de oń nátıje kórsetip otyr: Nıderland pen Qytaıda ıntellektýaldy basqarý júıeleri energııa tutynýdy edáýir qysqartqan.
Bizdiń el bul baǵytta energetıka salasyn keshendi reınjınırıngteý, ıntellektýaldy esepteý quraldaryn jedel engizý jáne drondarmen monıtorıngti keńeıtý arqyly «aqyldy energetıka» júıesine ótýdi kózdep otyr.
