Oblystyq tótenshe jaǵdaılar departamentiniń ımıdjdik jumys jáne syrtqy kommýnıkasııalar tobynan habarlaǵandaı, ataýly aıaldama №14 órt sóndirý bólimine taıaý ornalasqan. Al aıaldamany jabdyqtaý úshin 1988 jyly arnaıy maqsattaǵy qoldanystan shyǵarylǵan órt sóndirý avtokóligi paıdalanylǵan.
«Bul jobany iske asyrýǵa Atyraý qalasyndaǵy №14 órt sóndirý bóliminiń qutqarýshylary bastamashy boldy. Eski kólik bir aıda qaıta óńdelip, aıaldama retinde qurastyryldy», dep habardar etti departamenttiń ımıdjdik jumys jáne syrtqy kommýnıkasııalar tobynan.
Erekshe aıaldama alystan qaraǵanda, órt sóndirý kóligi turǵandaı áser beredi. Aıaldamanyń ataýy – «Qutqarýshy». Bul jazýdyń ústińgi bóligine 112 nómiri jazylǵan. О́rt sóndirý qyzmeti týraly aqparat berilgen.
«Bul, birinshiden, eski kólikti qaıta paıdalaný arqyly ekologııalyq mádenıet pen sana qalyptastyrý, ekinshiden, tótenshe jaǵdaı kezinde erge tán erekshe áreketpen jumys isteıtin órt sóndirýshiler eńbegin nasıhattaý. Qoǵamdyq kólikti kútýge yńǵaıly, ári kúnniń ystyǵy men jelden qorǵaıdy. Balalar men jasóspirimderge qaýipsizdik tehnıkasy men qutqarýshylar qyzmeti týraly oı salyp, qyzyǵýshylyǵyn týdyrady», dedi departament ókili.
Turǵyndar bul aıaldamany foto-vıdeoǵa túsirip, áleýmettik jelige júktep jatyr. Tipti balalaryn aıaldamanyń janynda sýretke túsiretinder de kóbeıdi.
Atyraý oblysy
