О́ńirde qazaqtyń baıyrǵy qarýy – sadaqty sán úshin, sport úshin tartyp júrgen jastar az emes. Alaıda, saıys sırek uıymdastyrylady. Sondyqtan da «ALTAI» telearnasy men «Keremet sadaq atý» ortalyǵy tele týrnır uıymdastyrýdy uıǵarǵan. Týrnırge kelgen oblys basshysy qatysýshylarǵa júrekjardy lebizin bildirip, sáttilik tiledi.
«Sadaq atý – halqymyzdyń ejelden kele jatqan ulttyq murasy, batyrlyq pen mergendiktiń nyshany. Bul sport túri jas urpaqtyń rýhyn kóterip, erik-jigerin shyńdap, tereńde jatqan tarıhymyzǵa úńildire túsedi. Barsha qatysýshylarǵa sáttilik tileımin! Jebelerińiz nysanaǵa dóp tıe bersin», dedi oblys ákimi.
Jarysqa 9-10 synypta oqıtyn 80-nen astam oqýshy qatysyp, jartylaı fınal men fınalda jamby atýdan synǵa tústi. Nátıjesinde, 1-oryn M. Lomonosov atyndaǵy orta mekteptiń oqýshysy Álı Baqytbek alsa, 2-oryn Aqjar orta mektep-ınternatynyń oqýshysy Aıbol Nasımollaev enshiledi. 3-oryn №49 jalpy bilim beretin mektep atynan shyqqan Abdýlazız Berikboluly qanaǵat tutty. Sondaı-aq, arnaıy taǵaıyndalǵan 4-oryndy №3 mektep-lıseıiniń oqýshysy Danııar Zeınelqabden aldy.
Aıta keteıik, bul sharada oqýshylar sadaq tartyp, baq synap qana qoıǵan joq, oblystaǵy mádenı oshaqtar uıymdastyrǵan kórmeni tamashalap, sadaqtyń tarıhy tóńireginde tyń aqparat ala aldy.
Shyǵys Qazaqstan oblysy
