Týrnırdiń ashylý saltanatyna Premer-mınıstr Oljas Bektenov, Halyqaralyq ústel tennısi federasııasynyń (ITTF) Bas hatshysy Raýl Kalın, «Nomad Table Tennis Academy» ústel tennısi akademııasynyń negizin qalaýshy Medeý Nurasyl qatysty.
Ústel tennısi – jyldamdyq, eptilik, shapshań oılaý qabiletin damytatyn tanymal sport túri. Keıingi jyldary bul oıyn elimizde keńinen qanat jaıyp, buqaralyq, kásibı deńgeıde damyp keledi. El kóleminde ústel tennısimen aınalysatyn seksııalar sany artty. Oblystyq, qalalyq sport mektepterinde balalar men jasóspirimderge arnalǵan úıirmeler kóptep ashylyp jatyr. Astana, Almaty, Shymkent syndy iri qalalarda zamanaýı ústel tennısi ortalyqtary jumys isteıdi. Elimizdiń sportshylary túrli álemdik, halyqaralyq týrnırlerge qatysyp, júldeli oralyp júr. Sportshylarǵa qoldaý retinde ulttyq quramanyń bazasy barynsha nyǵaıtylyp jatyr.
Ústel tennısiniń jańa satyǵa kóterilýiniń jarqyn bir kórinisi – elimiz 2024 jyly alǵash ret Azııa chempıonatyn qabyldady. 2027 jylǵy eresekter arasyndaǵy álem chempıonatyn ótkizý mártebesine ıe boldy. Munyń bári Memleket basshysynyń buqaralyq sportty damytýǵa erekshe mán berip otyrǵanynyń arqasy. Búginde ústel tennısimen 260 myńnan asa adam júıeli túrde shuǵyldanady. Salada 10 myńnan asa kásibı sportshy, 400-deı jattyqtyrýshy eńbek etedi. 20 óńirdegi federasııa turaqty jumys istep tur, 12 zamanaýı ústel tennıs ortalyǵy bar.
Týrnırdiń sońǵy kúni ústel tennısiniń álemdik juldyzdary – 2 dúrkin Olımpıada chempıony, 10 dúrkin álem chempıony Sıýı Sın (Qytaı), álem chempıony Fan Bo (Qytaı), álem chempıony Verner Shlager (Aýstrııa), álem chempıonatynyń eki márte júldegeri Djý Se Hıoktiń (Koreıa) qatysýymen shoý-match uıymdastyryldy. Bul kezdesýlerdi Memleket basshysy Q.Toqaev arnaıy baryp tamashalady.
Aýqymdy is-sharany Týrızm jáne sport mınıstrligi, Astana qalasynyń ákimdigi, Qazaqstan ústel tennısi federasııasynyń qoldaýymen «Nomad» akademııasy uıymdastyrdy. «Aspan Holdings, VD Stroy Engineering» kompanııalary demeýshilik etti. Týrnır buryn-sońdy bolmaǵan júlde qorymen tarıhta qaldy. Jetkinshek jeńimpazdardyń ózi tuńǵysh ret 5 000 dollaryna, kúmis júldegerler 2 500 dollarǵa, qola júldegerler 1 500 dollarǵa ıe boldy.
– Álemniń mańdaıaldy sheberleriniń arnaıy kelýi týrnırdi naǵyz merekege aınaldyrdy. Halyqaralyq jarys «Nomad Table Tennis» akademııasynyń elimizde ústel tennısin buqaralyq sportqa aınaldyrý jolynda jasaǵan alǵashqy qadamy boldy, – dedi akademııa dırektory Rýslan Jetibaev.
– Uıymdastyrý komıtetiniń kásibı deńgeıin erekshe atap ótkim keledi. Jarystyń árbir bólshegine deıin muqııat oılastyrylǵan. Ústel tennısinde Azııanyń úlesi basym, sol oraıda Qazaqstan da tennıs derjavasy retinde óz tuǵyryn bekite tústi, – dedi Halyqaralyq ústel tennısi federasııasynyń Bas hatshysy Raýl Kalın.
Tartysty týrnırdiń ár kúni úlken-kishi sportshylardyń ónerin, sheberligin pash etken kórkem kórinisterge, qyzyqty sátterge toly boldy. Tamashalaýǵa kelgen barsha jankúıerge umytylmas kóńil kúı, erekshe áser syılady.
