Aıda Balaeva uly ǵalym, aǵartýshy ári saıahatshyǵa arnalǵan ǵylymı eńbektiń jaryq kórýimen barsha zertteýshini quttyqtady. Mınıstrdiń aıtýynsha Shoqan Ýálıhanovtyń murasyn ıtalııalyq oqyrmandarǵa tanystyrý – Qazaqstan men Italııa arasyndaǵy rýhanı baılanysty tereńdetetin mańyzdy qadam.
«Shoqan Ýálıhanov – Uly dalanyń ǵana emes, álemdik deńgeıdegi tulǵa. Onyń zertteýleri halyqaralyq ǵylymı qaýymdastyqqa Ortalyq Azııa halyqtarynyń baı mádenıeti men órkenıetin, sondaı-aq qazaq halqynyń rýhanı murasyn keńinen tanytty. Onyń eńbekteriniń ıtalıan tilinde jaryq kórýi – bilim men ǵylym arqyly eki eldiń jaqyndasýynyń jarqyn úlgisi. Bul kitap ıtalııalyq oqyrmandarǵa qazaqtyń tarıhyn, mádenıetin jáne oı álemin jaqynyraq tanýǵa múmkindik beredi», dedi Aıda Balaeva.
Sondaı-aq mınıstr eki eldiń ǵalymdaryna, zertteýshilerine, aýdarmashylaryna shynaıy alǵysyn jetkizdi. Ol bul kezdesý Qazaqstan men Italııa arasyndaǵy ǵylymı baılanystardy nyǵaıtyp, jas ǵalymdar men zertteýshilerdi jańa izdenisterge jeteleıtinine senim bildirdi.
Shoqan Ýálıhanovtyń ómirbaıanyn Italııa professory Federıko Pastore jazǵan. Ol uzaq jyldar boıy ǵalymnyń ómiri men qyzmetine qatysty qazaqstandyq derekkózderdi zerttegen. Sondaı-aq monografııada Sh.Ýálıhanov ómirinde kezdesken belgili qazaq tulǵalaryna arnalǵan aýqymdy bólim bar.
Kitap Qazaqstan Respýblıkasynyń Italııa Respýblıkasyndaǵy Elshiliginiń qoldaýymen, «Sandro Teti Editore» baspasynan, qazaqstandyq «Kaspıı Neft» AQ men «Doscar Foundation Charity Fund» korporatıvtik qorynyń demeýshiligimen jaryq kórdi. Zertteý sonymen qatar aǵylshyn tilinde de qoljetimdi.
