Qalalyq «О́ner» mádenıet saraıynda «Ertis-Baıan» teatry esigin aıqara ashty. Jas shyǵarmashylyq ujymnyń tarıhy aqıyq aqyn Muqaǵalı Maqataev shyǵarmasynyń jelisimen sahnalanǵan «Qosh, mahabbat» spektakliniń premerasymen bastaldy.
Týyndyny jas ári talantty rejısser Bıbııajar Dıhan sahnalady. Poezııa tili arqyly adam seziminiń tereńdigin, mahabbattyń kúshin, taǵdyr dramasyn jetkize bilgen qoıylym kórermenderdi shynaıylyǵymen baýrady.
Ekibastuzda teatr ashý ıdeıasy birneshe jyldan beri talqylanyp kelgen. Joba óńir basshysynyń tapsyrmasy boıynsha 2024 jyldyń shildesinde qolǵa alynypty. Sol kezde Ekibastuzdyń baı mádenı dástúri men belsendi shyǵarmashylyq ortasy teatr ashýǵa barlyq alǵyshart bar ekenin baıqatqan. «Qaınar» ortalyǵy janynda 20 jyldan astam ýaqyt boıy «Maska» teatr stýdııasy tabysty eńbek etip júr. Qatysýshylary birneshe márte respýblıkalyq festıvalderdiń laýreaty atandy. Al 2020 jyly «О́ner» mádenıet saraıynda «Boıtumar» jastar mýzykalyq-teatr úıirmesi quryldy. Munyń barlyǵy kásibı teatrdyń qurylýyna negiz boldy.
«Ertis-Baıan» teatryn qurýǵa bıýdjetten shamamen 50 mıllıon teńge bólingen. Ujymda ázirshe 18 qyzmetker eńbek etedi, olardyń 12-si – Astana, Almaty, Túrkistan, Aqtóbe qalalarynan shaqyrylǵan kásibı ártister. Basym bóligi K.Baıseıitova atyndaǵy Qazaq ulttyq óner ýnıversıtetiniń túlekteri Sondaı-aq teatr qoıylymdaryna Júsipbek Aımaýytov atyndaǵy Pavlodar oblystyq qazaq mýzyka-drama teatrynyń ártisteri de qatysady.
Qazaq teatrynyń saltanatty ashylý rásimine oblys ákimi Asaıyn Baıhanov qatysyp, ekibastuzdyqtardy aıtýly oqıǵamen quttyqtady.
– Bolashaqta teatr úshin jeke ǵımarat salý josparda bar. Ekibastuz tek kómir men energııanyń ǵana emes, rýhanııat pen ónerdiń de ordasyna aınalady, – dedi ákim.
«Qosh, mahabbat» spektakliniń premerasy jańa shyǵarmashylyq ujymnyń debıýti ǵana emes, shahardaǵy jańa teatr maýsymynyń ashylýyndaı sezildi.
Atap óterligi, teatr jetekshisi Talǵat Saǵyntaev úlken uıymdastyrýshylyq jumys atqardy. Almatydaǵy M.Áýezov atyndaǵy Qazaq ulttyq drama teatrynyń tárbıesin kórgen tanymal akter búginde «О́ner» mádenıet ortalyǵynyń basshysy bolyp qyzmet etip júr.
