Elimizdiń namysyn qorǵaǵan 16 taekvondoshynyń arasynan ekeýiniń ǵana baǵy jandy. 46 kg salmaqta synǵa túsken Aıdana Qumartaeva men 49 kg salmaqta óner kórsetken Nodıra Ahmedova qola medaldy moıyndarynda jarqyratty. Osy nátıjeniń arqasynda jerlesterimiz Ulybrıtanııa, Iordanııa, AQSh quramalarymen birge 16–19 oryndardy ózara bólisti. Jalpy komandalyq esepte 3 altyn, 2 kúmis, 1 qola medalmen Túrkııa top jardy. Ekinshi, úshinshi oryndarda – Ońtústik Koreıa (2+2+2) men Brazılııa (2+2+0).
Elimizdiń taekvondoshylary álem chempıonatyna táýelsizdik alǵan kezden beri úzdiksiz qatysyp kele jatyr. 1999 jyly Kanadanyń Edmonton qalasynda uıymdastyrylǵan jarysta Ádilhan Saǵyndyqov (84 kg) qola medal ıelendi. 2003 jyly Germanııanyń Garmısh-Partenkırhen qalasynda Lııa Nurkına (67 kg) óreli ónerimen óz jankúıerlerin qýantyp, qola júlde enshiledi. 2007 jyly Beıjińde jerlesterimiz eleýli tabysqa qol jetkizdi. Qytaı astanasyna attanǵan sportshylarymyzdyń úsheýi elge qola medalmen oraldy. Olar – Aslan Batyqulov (54 kg), Arman Shylmanov (84 kg), Názgúl Tájiqulova (51 kg).
2009 jyly Kopengagende 84 kg-dan +87 kg salmaqqa aýysqan Olımpııa oıyndarynyń júldegeri Arman Shylmanov qatarynan ekinshi ret qola medal enshiledi. Odan keıin biraz ýaqyt boıy otandyq taekvondomyz toqyraý kezeńin basynan ótkerdi. Tek 2017 jyly Mýdjý (Ońtústik Koreıa) men 2019 jyly Manchesterde (Ulybrıtanııa) Qaırat Sarymsaqov (74 kg) qola medaldy qanjyǵasyna baılady. Odan keıin 2022 jyly Gvadalahara (Meksıka) men 2023 jyly Bakýde (Ázerbaıjan) uıymdastyrylǵan baıraqty básekelerde baǵymyz janbady.
