Foto: ashyq derekkóz
«Qarjylandyrýdyń balama tetikterin damytý úshin ámbebap bankterge qolda bar lısenzııa sheńberinde ıslamdyq bank operasııalaryn júzege asyrý quqyǵyn berý kózdeledi. Bul normalar bankterge jeke bankti qurmaı-aq, óz qurylymynda arnaıy bólimsheler ashý arqyly ıslamdyq ónimderdi usynýǵa múmkindik beredi», dedi Mádına Ábilqasymova.
Zań jobasynda ıslamdyq bankıngti uıymdastyrýshylyq turǵydan oqshaýlaý, aktıvter men mindettemelerdi bólek esepke alý jáne basqarý, jeke qyzmetkerlerdi bólý sekildi qaǵıdalar qamtylǵan. Sonymen qatar, árbir bank qurylymynda sharıǵat talaptaryna sáıkestikti qadaǵalaıtyn keńes pen aýdıt júıesi mindetti túrde engizilmek.
Bankter týraly jańa zań jobasynda sonymen birge tehnologııalyq ózgerister men sıfrlyq aktıvter aınalymyn yryqtandyrý, bank sektorynyń ekonomıkany qarjylandyrýdaǵy rólin kúsheıtý jáne naryqqa jańa qatysýshylardy tartý máseleleri de qarastyrylǵan.
Jańa bastama ıslamdyq bankıngtiń ınvestısııalyq áleýetin arttyryp, qarjylandyrý kózderin ártaraptandyrýǵa jol ashpaq.
