Fýtbol. Qazaqstan Ispanııamen joldastyq kezdesý ótkizedi

ASTANA. 24 maýsym. Fýtboldan Qazaqstan quramasy 2016 jyly Ispanııamen joldastyq kezdesý ótkizedi. Bul týraly Qazaqstan fýtbol federasııasynyń baspasóz qyzmeti habarlady. Mundaı kelisimge Almatyda fýtboldan Qazaqstan Prezıdentiniń Kýbogy úshin ótip jatqan týrnır barysynda qol jetti. Federasııanyń bas menedjeri Asqar Uranhaevtyń aıtýynsha, ıspandarmen birlesip jumys isteý óte tıimdi. Atalǵan match týraly ol: «Joldastyq kezdesýdi kelesi jyly ótkizýdi josparlap otyrmyz. Naqty datasyn aldaǵy ýaqytta anyqtaımyz. Bizdiń qurama úshin mundaı deńgeıdegi oıyn áli bolǵan emes», – dedi. Sondaı-aq, A.Uranhaev elimizden birneshe jas fýtbolshyny Ispanııaǵa jiberý múmkindiginiń týǵanyn aıtty. Ol jaqta jastarymyz fýtboldyń qyr-syryn tereń meńgeretin bolady. Ispanııa quramasy álemdegi fýtbol alpaýyttarynyń biri ekeni belgili. Olar 2010 jyly álem chempıonatynda jáne 2008, 2012 jyldary Eýropa chempıonatynda jeńimpaz atandy. Aıta keteıik, Almatyda ótip jatqan týrnırge 17 jasqa deıingi jasóspirimder qatysýda. Bul saıysta Qazaqstan men Ispanııa jastary bir topqa túsken bolatyn. Keshe ótken qos komanda arasyndaǵy oıynda ıspandar 5:0 esebimen jeńiske jetti. Elaman Qońyr. Derek: Qazaqstan fýtbol federasııasynyń baspasóz qyzmeti. Sýret: footballtop.ru.