Egis alqabyndaǵy kombaındardyń tynymsyz qozǵalysy eńbek kórigin qyzdyrýmen qatar oraq naýqanynyń ýaqtyly, sapaly júrgizilýin qamtamasyz etip otyr. Sharýashylyq basshysy Talǵat Sultanov dala tósindegi dıqandardyń jumysyn úılestirip, óndiristik úderistiń tıimdi uıymdastyrylýyna jiti kóńil bóledi.
Kúrish ósirýdiń sheberi atanǵan sharýashylyqtyń sýarmaly jerleriniń jalpy kólemi 730 gektardy quraıdy, onyń 247 gektary – kúrish, 205 gektary – bıdaı, 278 gektary – kópjyldyq shópter. Egin jınaýǵa eki kombaın, bir «KamAZ» júk kóligi, sondaı-aq «MTZ-80», «MTZ-1221» traktorlary tartylǵan. Búgingi kúni 110 gektar kúrish orylyp, ortasha ónimdilik gektaryna shamamen 40 sentnerdi qurap otyr.
– Jer eńbekti jemeıdi. Sonaý kóktemnen bastalatyn tynymsyz eńbektiń óteýi kúzgi jıyn-terimde kórinedi. Bıylǵy túsim jaman emes. Kóńil toǵaıtar ónimdi ysyrapsyz jınap alýǵa jumysshylar bilek sybana kirisip ketti. Bul ujymnyń birligi men tynymsyz tirliginiń nátıjesin aıǵaqtaıdy, – deıdi sharýashylyq basshysy.
Bıyl Balqash aýdanyndaǵy sýarmaly egistik jerlerdiń jalpy kólemi 27 myń gektardan asty. Onyń ishinde 7 myń gektardan astam jerge kúrish egilse, 5 myń gektardan astamy – bıdaı men arpa egisi. Qalǵan alqaptarǵa kókónis, baqsha, mal azyqtyq daqyldar ósirilgen.
Shóp daıyndaý naýqany barysynda 160 myń tonnadan astam pishen, 40 myń tonnadan asa súrlem-shóp, shamamen 33 myń tonna saban, 85 myń tonna súrlem daıyndalǵan. Dándi daqyldardan jınalǵan ónim kólemi 9 myń tonnadan asyp, ortasha ónimdilik gektaryna 18 sentnerdi qurady. Qazirgi ýaqytta 6 myń gektardan astam kúrish alqaby orylyp, ortasha ónimdilik gektaryna 42 sentnerge jýyqtady.
Kúz mezgili – dástúrli túrde aýyl sharýashylyǵy maýsymynyń qorytyndysyn shyǵaratyn ýaqyt. Balqash aýdanynyń bereke men molshylyqtyń belgisine aınalǵan kúrish ónimi – dıqandardyń tynymsyz eńbegi men joǵary kásibı sheberliginiń nátıjesi. Eginshiler óńirdiń agrarlyq salasyn turaqty damytýǵa, azyq-túlik qaýipsizdigin nyǵaıtýǵa eleýli úles qosyp keledi.
Almaty oblysy,
Balqash aýdany
