Foto: Aýyl sharýashylyǵy mınıstrligi
«Syrym» veterınarııalyq baqylaý beketinde Samar oblysynan (RF) Qyzylorda oblysyna bet alǵan júk kóligi toqtatylyp, kólikten 63 myń dana taýyq jumyrtqasy tasymaldanyp kele jatqany anyqtalǵan.
Qujattyq baqylaý nátıjesinde zańbuzýshylyq anyqtaldy: veterınarııalyq ilespe qujattarda kórsetilgen júk jóneltýshi janýardan alynatyn ónimderdi EAEO elderine jetkizýge ruqsaty bar uıymdardyń tizilimine engizilmegen. Sol sebepti júk keri qaıtaryldy. Al júrgizýshige Ákimshilik quqyq buzýshylyq týraly kodeksiniń 406-baby boıynsha ákimshilik hattama toltyrylyp, aıyppul salyndy. Tasymaldaýshyǵa qoldanystaǵy veterınarııalyq-sanıtarııalyq talaptar túsindirildi.
Aýyl sharýashylyǵy mınıstrliginiń málimetinshe, 2025 jyldyń basynan beri EAEO elderimen shekarada veterınarııalyq-sanıtarııalyq ınspektorlar 57 185 kólik quralyn jáne shamamen 738 myń tonna mal sharýashylyǵy ónimderin teksergen. Nátıjesinde 1 020 kólik keri qaıtarylyp, 397 ákimshilik hattama toltyrylǵan. Aıyppuldardyń jalpy somasy 19,7 mln teńgeni quraǵan.
Sonymen qatar, úshinshi eldermen shekaradaǵy ótkizý beketterinde 21 654 avtokólik, 69 802 temirjol quramy, 257 teńiz kemesi jáne 2,139 mln tonnadan astam mal sharýashylyǵy ónimi tekserildi. Tekserý qorytyndysy boıynsha 24 avtokólik keri qaıtarylyp, 24 ákimshilik hattama resimdeldi.
