О́KQ brıfıngi barysynda aýdan ákiminiń mindetin atqarýshy Janat Júnisbekovtiń aıtýynsha, aýdanda «Alacem» sement zaýytyn qosa alǵanda 9 ónerkásip orny jumys isteıdi. «Alacem» aýdan ónerkásibiniń 87,6%-yn qamtamasyz etip, 10 aıda 1,2 mln tonna sement óndirgen. «Jolaman qıyrshyq tas zaýyty» 807 mln teńgeniń ónimin shyǵaryp, óndiris kólemin 44,1%-ǵa arttyrdy. Al mamyrda iske qosylǵan «Teharenda» JShS 77,3 mln teńgeniń betonyn óndirdi.
J.Júnisbekovtiń aıtýynsha, ónerkásip ósimi – bızneske qolaıly jaǵdaı men jańa jobalardy iske asyrýdyń nátıjesi.
2026–2028 jyldarǵa arnalǵan ınvestısııalyq pýlǵa jalpy quny 1,4 trln teńge bolatyn 9 joba engizilgen. Olar iske asqanda 2500-den asa adam jumyspen qamtylady. Eń iri joba – «Shoǵyrlandyrylǵan qurylys taý-ken kompanııasy» JShS: jylyna 50 mln tonna rýda óńdep, 860 myń tonna mys konsentratyn jáne 5 myń tonna mys katodyn shyǵarmaq. Jobanyń quny – 1,3 trln teńge, 2200 jańa jumys orny ashylady.
Sonymen qatar 2027 jyly jyldyq qýaty 110 myń tonna suıytylǵan tabıǵı gaz óndiretin «Qazaq LNG Almaty» zaýyty iske qosylady. Tikeleı sheteldik ınvestısııa kólemi – shamamen 70 mln AQSh dollary. Qurylys kezinde 300, jumys barysynda 70 adam eńbekpen qamtylady. Buǵan qosa kún elektr stansııasy, mal bordaqylaý alańy, áktas jáne asfalt zaýyttarynyń jobalary qarastyrylǵan.
Týrızm de qarqyn alyp keledi: bıylǵy jartyjyldyqta kelýshiler sany men kórsetilgen qyzmet kólemi eki ese artty. «Altynemel» ulttyq parkine 10 aıda 31,3 myń týrıst kelgen.
Aýdan basshylyǵy ınvestısııa tartýdy ári qaraı da basty basymdyq retinde jalǵastyra beretinin jetkizdi.
