COOK jýrnalynyń tilshileri bıyl jazda Almaty qalasy Týrızm basqarmasy men Almaty Tourism Bureau shaqyrtýymen kelip, qalamyzdyń gastronomııalyq dástúrlerimen, mádenıeti, týrıstik áleýetimen tanysyp qaıtqan bolatyn. Osy sapardyń nátıjesinde týǵan reportajda Almaty, Kólsaı men Qaıyńdy kólderi, Sharyn shatqaly syndy týǵan ólkemizdiń tabıǵı jaýharlary jazylǵan. Betke ustar týrıstik nysandar qala ınfraqurylymymen, zamanaýı gastronomııalyq oryndarymen úılesip, biregeı týrıstik baǵyt retinde usynylǵan.
Jolsapardan jazylǵan reportajda ásirese, Almatynyń búgingi azpazdyq ónerine erekshe kóńil bólinip, etten daıyndalǵan túrli tiskebasarlar, baıyrǵy ulttyq taǵamdar týraly baıandalady. Sonymen qatar qymyzdyń qazirgi zamanda qalaı daıyndalatyny, kelgen qonaqtarǵa qalaı usynylatyny shuraıly sýretteledi.
Jýrnalda Neo Nomad cuisine baǵyty da qamtylǵan. Maqalada baýyrsaq, qurt, ystalǵan jylqy eti sııaqty taǵamdardyń daıyndaý ádisteri berilip, tabıǵı qazaq ashanasy tamasha sıpattalady.
Batys jýrnalısteri Almatydaǵy qazaqtyń dástúrli «Auyl», «Jinau», «Sandyq», «Tary» syndy meıramhanalaryn mysalǵa alyp, ulttyq taǵamdardy zamanaýı tásilmen, jergilikti dámdeýishtermen sheber úılestiretinin de egjeı-tegjeıli, áserli sıpattaıdy.
2025 jyldyń alǵashqy jartyjyldyǵynda Almatyǵa kelgen ıtalııalyq týrıster sany 2024 jyldyń osy kezeńimen salystyrǵanda 10,9%-ǵa ósken. Bul megapolıstiń týrıstik shahar retinde tanymaldylyǵy men gastronomııasyna degen qyzyǵýshylyǵy arta túskenin, halyqaralyq BAQ pen álem týrısteriniń nazarynda ekenin kórsetedi.
