Foto: Mádenıet jáne aqparat mınıstrligi
Bir aıda eki baıqaýdyń jeńimpazy
Ábilmansur Syrmanovtyń «Jızel» baletindegi Albert varıasııasy 9-shy Pekındik bı mektepteri arasyndaǵy baıqaý kórermenderin dúrkireı qol soqtyryp tánti etken. 10 elden kelgen 60-qa jýyq qatysýshynyń arasynan Qazaq ulttyq horeografııa akademııasynyń stýdenti úzdik shyǵyp, qazylar alqasynan eń joǵary baǵalardy alǵan.
Al jańa jeńisine Budapest Ballet Grand Prix 2025 (Vengrııa) baıqaýynda qol jetkizdi. Halyqaralyq qazylar alqasy Á.Syrmanovtyń erekshe talanty men ónerge degen adaldyǵyn atap, oǵan Eýropanyń jetekshi balet jobalaryna shaqyrtý usynyp, oqý jáne taǵylymdamalarmen marapattady.
Daıyndyq óte aýyr bolǵan
Onyń aıtýynsha, baıqaýlarǵa daıyndyq ońaı bolmaǵan. Toqtaýsyz jattyǵýlar, ár pozısııany muqııat shyńdaý, keshke deıin qaıtalanatyn varıasııalar – kúndelikti tártip. Keı kúnderi bulshyqetteri tipti baǵynbaı qalǵan mezetteri de bolǵan.
Ábilmansur Syrmanovtyń ustazy Qazaq ulttyq horeografııa akademııasynyń oqytýshysy Áset Myrzaqulov.
«Biz baıqaýǵa daıyndyqty bárinen erte, tamyz aıynda bastadyq. Úsh aı daıyndaldyq. Qazir oǵan fızıkalyq ta, psıhologııalyq ta demalyp, qalpyna kelý kerek. Bir aıda eki baıqaý – ártis úshin óte qıyn. Qudaı qalasa, sáýirde Perm qalasynda ótetin «Arabeskı» halyqaralyq úlken baıqaýyna daıyndalamyz. Bul – balet álemindegi eń bedeldi jarystardyń biri», deıdi Áset Myrzaqulov.
24.kz málimetinshe, Qazaq ulttyq horeografııa akademııasy búginde jas daryndardyń ustahanasyna aınaldy. Olar Qazaqstan atyn álemdik sahnalarda laıyqty tanytyp, kórermenderdiń júregin jaýlap júr. Bıyl osy altyn uıanyń 10 jyldyq mereıtoıy.
