Foto: ria.ru
Sondaı-aq BUU Bas Assambleıasy Reseıden balalardy kúshtep kóshirý, deportasııalaý, olardy otbasynan jáne zańdy qamqorshylarynan ajyratý, jeke mártebesin ózgertý (azamattyq berý, asyrap alý nemese qamqorlyqqa berý) arqyly ıdeologııalyq nasıhat júrgizý isin dereý toqtatýyn talap etip otyr.
Atalǵan qujat uıymnyń Bas hatshysyn óziniń ókilettikterin paıdalana otyryp, máseleni Arnaıy ókiliniń kómegimen sheshýge úndeıdi.
Bas Assambleıa ókili Annalena Berbok osy máseleni tııanaqtaýǵa arnalǵan jıynda joǵaryda atalǵan jaǵdaılardy basynan ótkergen Ýkraın balasynyń oqıǵasyn aıtyp berdi.
«Kóz aldyńyzǵa elestetip kórińizshi... Sizdiń jasyńyz 16 shamasynda. Bir kúni úıińizge betperde kıip, qarý asynǵan sarbazdar basyp kirip, sizdi kúshtep ózińizge belgisiz aımaqqa alyp ketedi. Odan keıin birneshe aıdy qorqynyshty jaǵdaıda ótkizip, tipti atyńyzdy aýystyryp jiberedi. Bul – Reseıge kúshtep deportasııalanyp, áskerı daıyndyqqa jiberilgen myńdaǵan ýkraın balasyna ortaq oqıǵa. Osyndaı jaǵdaıǵa tap bolǵan balalar BUU atqaratyn mindetterden beıhabar bolýy múmkin. Sondyqtan biz qoǵamnyń eń osal ókilderi, balalardyń únine qulaq asýymyz qajet», dedi Annalena Berbok.
Jeneva konvensııasynyń 49-babynda basyp alynǵan aýmaqtan balalardy kúshtep kóshirý nemese deportasııalaýǵa tyıym salynǵan. Annalena Berbok osy tyıym oryndalmaı otyrǵanyna da nazar aýdardy.
Jıynda sóz alǵan Ýkraına syrtqy ister mınıstriniń orynbasary Marıana Besanyń aıtýynsha, búgingi kúnge deıin Reseı Federasııasy keminde 20 myń ýkraınalyq balany óz elinen májbúrli túrde alyp ketken. Olardyń keıbiri qaıtarylsa, basym bóliginiń qazirgi hali, taǵdyry belgisiz.
Al BUU jıynyna qatysqan Reseıdiń BUU janyndaǵy Turaqty ókiliniń orynbasary Marııa Zaboloskaıa qarar balalardy qorǵaýǵa emes, Reseıdiń balalardy deportasııalaý isin qazbalaýdy kózdeıtinin atap ótti.
Onyń sózinshe, Reseıdiń 20 myń ýkraın balasyn májbúrli kóshirgeni týraly derek birneshe jyldan beri ózgerissiz aıtylyp keledi.
«Bastamashy taraptyń naqty tizimin nemese ata-analarynyń ótinishin aldymyzǵa tartqanyn kórgen joqpyz. Halyqaralyq Qyzyl Krest komıteti, Qasıetti Taq jáne Qatar memleketi bul máselede deldal bolyp otyr. Reseı basshylyǵy da AQSh-tyń birinshi hanymy Melanııa Tramptyń áskerı áreketterden zardap shekken balalardyń taǵdyryn sheshý jónindegi bastamasyn qoldaıdy. Osyǵan deıin 122 – ýkraınalyq, 39 – reseılik bala óz eline qaıtaryldy», dedi Marııa Zaboloskaıa.
Sondaı-aq Zaboloskaıa Reseıdiń halyqaralyq gýmanıtarlyq quqyqty buzyp, ýkraınalyq balalardy kúshtep asyrap alǵany týraly aqparatty da joqqa shyǵardy.
