– Qazaqstan men Eýropa Odaǵyn ózara senim men túsinistikke negizdelgen jan-jaqty yntymaqtastyq baılanystyrady. Biz kóptegen máseleni qarastyryp, seriktestigimizdi jańa ári sapaly deńgeıge shyǵarýǵa nıetti ekenimizdi rastadyq. Álginde aıtqanymdaı, Prezıdent Antonıý Koshtanyń elimizge sapary Keńeıtilgen seriktestik jáne yntymaqtastyq týraly kelisimniń 10 jyldyǵy qarsańynda ótip otyr. Qazaqstan – Ortalyq Azııa elderiniń ishinde «jańa býyn» kelisimine qol qoıyp, ratıfıkasııalaǵan alǵashqy el. Bul mańyzdy qujat ekijaqty qarym-qatynastyń órbýine negiz qalap, saýda, ınvestısııa, ınfraqurylym, ınnovasııa, mádenıet salalary sekildi ózara yqpaldastyqtyń barlyq basty baǵyttaryn qamtyǵan, – dedi Memleket basshysy.
Qazaqstan Prezıdentiniń aıtýynsha, talqylaýǵa arqaý bolǵan negizgi taqyryp – ekonomıkalyq yntymaqtastyq.
– Búgin biz saýda-ınvestısııalyq baılanystardy odan ári arttyrýǵa jáne ártaraptandyrýǵa ýaǵdalastyq. Qazaqstan aldaǵy ýaqytta da eýropalyq bıznes ókilderine turaqty ári ashyq ınvestısııalyq klımat qalyptastyrýdy jalǵastyra beredi. Energııa tıimdiligi, asa mańyzdy mıneraldar, sıfrlyq tehnologııa jáne kólik baılanysy sekildi salalarda yntymaqtastyqqa múmkindik mol, – dedi Qasym-Jomart Toqaev.
Memleket basshysy kelissóz barysynda kólik-logıstıka qatynastaryn nyǵaıtý joly, sonyń ishinde Transkaspıı halyqaralyq kólik baǵdaryn damytýǵa birlese kúsh-jiger jumyldyrý máselesi qarastyrylǵanyn atap ótti.
– Bul rette Qazaqstan men Eýropa Odaǵy arasyndaǵy úılestirý platformasynyń jumysyn, sondaı-aq EO-nyń «Global Gateway («Jahandyq qaqpa») bastamasyn quptaımyz. Qazaqstan Eýropa Odaǵynyń Ortalyq Azııa elderine arnalǵan 12 mıllıard eýro kólemindegi ınvestısııalyq paketine qoldaý bildiredi. Bul qarjy kólik, shıkizat resýrstary, «jasyl» energetıka jáne sıfrlyq tehnologııa jobalaryn iske qosýǵa baǵyttalady. Birlesken kúsh-jiger arqyly Qazaqstandy Eýrazııa keńistigindegi basty kólik toraptarynyń birine aınaldyra alatynymyzǵa senimdimiz. Bul barlyq tarapqa da paıdaly. Budan bólek, biz energetıkalyq qaýipsizdik pen energııa resýrstarynyń turaqty jetkizilimin qamtamasyz etý múmkindikterin talqyladyq. Energetıkalyq seriktestiktiń tyń baǵyttarynda, atap aıtqanda, asa mańyzdy mıneraldar, atom energetıkasy, munaı hımııasy, sondaı-aq jańartylatyn qýat kózderi salalaryndaǵy yntymaqtastyqty keńeıtýge ýaǵdalastyq. Maqsatymyz – shıkizat jetkizip qana qoımaı, Eýroodaq standarttaryna saı tabıǵı resýrstardy tereń óńdeıtin jergilikti óndiristerdi damytý, qosylǵan quny joǵary ónim shyǵarý jáne qaldyqtardy óńdeý arqyly Qazaqstannyń eýropalyq jetkizý tizbegimen ıntegrasııasyn kúsheıtý, – dedi Qazaqstan Prezıdenti.
