Ol bıyl uzyndyǵy 1,7 myń shaqyrym bolatyn 9 jańa jol ýchaskesi iske qosylǵanyn aıtty.
«Osylaısha aqyly ýchaskelerdiń jalpy sany 26 birlikke, al uzyndyǵy 4 900 shaqyrymǵa jetti. Osy jyldyń 11 aıynda aqyly joldardan 79 mlrd teńge tústi», dedi Darhan Imanashev.Bul qarajatqa uzyndyǵy 4,9 myń shaqyrym 26 aqyly ýchaskeni kútip ustaý jáne aǵymdaǵy jóndeý, aqy alý júıesiniń ınfraqurylymyn qamtamasyz etý, sondaı-aq sońǵy jyldary 1 myńǵa jýyq jol-paıdalaný tehnıkasy satyp alynǵany, ınvestor shyǵyndaryn óteý jáne ózge de ákimshilik shyǵystar júzege asyrylǵany aıtyldy.
Sonymen qatar Darhan Imanashev avtojol qurylysyna jańa tehnologııalardy engizý boıynsha júrgizilip jatqan jumystar týraly da aıtyp ótti. Onyń aıtýynsha, jańa ýchaskelerde qurylys nysandaryn aqparattyq modeldeý tehnologııasy qoldanylady. Kepildigi bar ýchaskelerde jasandy ıntellekt arqyly jol jamylǵysyndaǵy aqaýlardy avtomatty anyqtaý júıesi paıdalanylady.
«Oryndalatyn jumystar men qoldanylatyn jol-qurylys materıaldarynyń sapasyn baqylaýǵa erekshe kóńil bólinedi», dedi D.Imanashev.Spıker bul baǵytta kelesi sıfrlyq sheshimder qoldanylyp jatqanyn aıtty:
- «Q-RAM» júıesi – qaıta jańǵyrtý, ortasha jáne kúrdeli jóndeý nysandaryndaǵy jumystyń barysyn baqylaý;
- «KazRoadLab» – zerthanalyq synaq nátıjelerin naqty ýaqyt rejıminde baqylaý;
- «Smart Road Diagnostic System» – GPS koordınattarymen jasandy ıntellekt algorıtmderi negizinde jol tóseminiń jaı-kúıin taldaý;
- «Sıfrlyq teńge» mehanızmi – shyǵystardyń ashyqtyǵyn qamtamasyz etý.
Aıta keteıik, buǵan deıin bıyl elimizde 13 myń shaqyrym avtojol jóndeý jumystarymen qamtylǵanyn jazǵan edik.
