Kollajdy jasaǵan – Qonysbaı ShEJIMBAI, «EQ»
Bizdiń fýtbol klýbtary da eýrokýboktyq dodalardyń irikteý kezeńine qatysyp, birdi-ekilisi Chempıondar lıgasynyń toptyq kezeńinde baq synap, qomaqty qarjy tapty da. Almatynyń «Qaırat» fýtbol klýby ÝEFA Chempıondar lıgasynyń jalpy kezeńinde tartysqa túsip, ár matchtan qorjynyna qyrýar qarjy quıylyp ta jatyr. Fýtbol ındýstrııasyn órkendetip, ıgiligine kenelip otyrǵan ázirge elimizdegi birden-bir ujym – «Qaırat». О́zge óńirlerdiń komandalary da damýdyń osy jolyna túsýdiń qamyn áldeqashan oılastyrýy qajet edi.
Ulttyq quryltaı otyrysynda Memleket basshysy: «Klýbtar oblystyq bıýdjetterge ǵana arqa súıemeı, shetelderdegi sekildi ózderi de tabys tabýdy úırenýi kerek. Sondyqtan men kásipkerlerdi klýbtyq fýtbolǵa bıznes retinde qaraýǵa shaqyramyn. Fýtbol klýbtary jekemenshikke ótpeı, is alǵa baspaıdy. Bul – álemdik tájirıbe. Klýbtar jekemenshik bolsa, shetel sportshylaryn shaqyrý quqyǵyna ıe bolady», dep atap ótti.
Sondaı-aq bıylǵy Joldaýynda da Prezıdent sportqa árdaıym basa kóńil bóletinin aıtty. «Barshańyzǵa málim, men buqaralyq sportty damytýǵa basa mán beremin. Aımaqtarda sport nysandary boı kóterip jatyr. Úıirmeler balalarǵa qoljetimdi bola bastady. Erekshe qajettiligi bar azamattarǵa, egde adamdarǵa arnalǵan sport klýbtary ashylyp jatyr. Men buǵan deıin shetelden kelgen sportshylarǵa bıýdjetten qarjy bólýdi shekteý týraly tapsyrma berdim. Depýtattar bul bastamany qoldap, arnaıy zań qabyldady. Bul – óz sportshylarymyzdy qoldaýǵa arnalǵan mańyzdy qadam. Biraq munymen shektelip qalýǵa bolmaıdy, alǵa qaraı júrýimiz kerek. Fýtbol klýbtaryn jekeshelendirýge qatysty jumysty tezdetý kerek. Qazir elimizdiń tórt fýtbol klýbyna belgili kásipkerlerimiz ıe boldy, ıaǵnı klýbtar jekemenshikke ótip jatyr. Sol úshin olarǵa rızashylyǵymdy bildiremin. Degenmen fýtboldy kommersııalandyrý isin jalǵastyra berý kerek. Mundaı qadamsyz elimizde fýtbol damymaıtynyn álemdik tájirıbeden kórip otyrmyz. Qazirgi zamanda kásibı sportty qomaqty tabys ákeletin bıznes-ındýstrııa retinde qarastyrǵan jón», dedi Memleket basshysy. Tıisti oryndarǵa fýtbol klýbtaryn jekeshelendirý sharýasyn jedeldetýdi, kásibı sportty qomaqty tabys ákeletin salaǵa aınaldyrýdy júktedi.
Elimizdegi birqatar fýtbol klýbtary búginde jeke ıelikke ótti. Igi bastama áli de jalǵasyn tabady. Jaqynda Qaraǵandynyń «Shahtıor» fýtbol klýbyn «Freedom Holding Corp.» tobyna ıe kásipker Tımýr Týrlovqa tıesili kompanııa satyp aldy. Saýda aýksıon arqyly ótip, Memleket basshysynyń buqaralyq sportty damytý, fýtboldy kommersııalandyrý jónindegi tapsyrmasyn júzege asyrý aıasynda júzege asty. Endi «Shahtıor» fýtbol klýbynyń damýy men transformasııasynyń jańa kezeńi bastalady. Qaraǵandy oblysynyń ákimdigi men tanymal kásipker Tımýr Týrlov óńirde jańa fýtbol ekojúıesin qurý jumysyn bastady. Bul maqsatqa jalpy 18,5 mlrd teńge bólinip otyr. Qarjynyń 12 mlrd teńgesi jańadan boı kóteretin fýtbol akademııasyn salýǵa, 6,5 mlrd teńgesi balalar-jasóspirimder men buqaralyq fýtboldy damytýǵa baǵyttalmaqshy. Qaraǵandy oblysy fýtbol qaýymdastyǵynyń (QOFA) prezıdenti Tımýr Týrlovtyń qoldaýymen buǵan deıin de birqatar iri jobalardy júzege asyrdy. Olardyń ishinde mektep oqýshylaryn qamtyǵan «Alga!» jobasy da bar. Igi bastama 2029 jylǵa deıin 40 myńnan astam mektep oqýshysy men 3 600 stýdentti qamtıdy, fýtbol bastamalary 100-den astam oqý ornynda júzege asyrylady. Budan bólek, balalar men jasóspirimderdiń resmı lıgasy «Freedom BFL» bar.
Zamanaýı úlgide salynatyn «Shahtıor» fýtbol akademııasy Qaraǵandy oblysyndaǵy buqaralyq, sondaı-aq kásibı fýtboldy damytýǵa serpin bermek. Ortalyqta balalar-jasóspirimder fýtboly, ınfraqurylymdyq jobalar men áleýmettik bastamalar júzege asyrylady. 10 ga aýmaqqa salynatyn fýtbol akademııasynda jyl boıy daıyndyq jasaýǵa arnalǵan jabyq manej, tolyq ólshemdi jattyǵý alańy, eki qabatty ákimshilik-bólme kesheni, medısınalyq ortalyq, basseın, saýna, ashana men tárbıelenýshilerge arnalǵan jataqhana bolady. Qurylys-montaj jumystary josparǵa sáıkes 2027 jyly aıaqtalýǵa tıis. О́ńirde fýtboldy órkendetý maqsatynda kadr daıarlaý isine de aıryqsha mán beriledi. Jattyqtyrýshylardyń halyqaralyq taǵylymdamalar men UEFA lısenzııalaryn alý múmkindigin qamtıtyn biliktilikti arttyrý baǵdarlamalary engiziledi.
Elordalyq «Jeńis» fýtbol klýbyn belgili kásipker Mıhaıl Lomtadze satyp aldy. Ol Astanada álemdik deńgeıdegi balalar akademııasyn salýǵa ınvestısııa tartyp, qarjy bóletinin málimdedi. Memleket basshysynyń elimizde fýtboldy damytý strategııasy aıasynda kásipker álemdik deńgeıdegi fýtbol akademııasyn salý jospary týraly aıtqan-tyn. «Jeńis» klýbynyń jańa ıesi endi akademııany klýbtyń bazasynda salatynyn jetkizdi. Jańa keshen iske qosylǵanda daryndy jetkinshek fýtbolshylar ázirlik ótkerip, bilikti bapkerlerden tálim alady.
«Meniń armanym – Qazaqstan men Anglııada eń talantty jas fýtbolshylar, bolashaq juldyzdar tárbıelenetin álemdik deńgeıdegi kásibı balalar fýtbol akademııasyn qurý. Oqytý tegin júzege asyrylady. Jas sportshylar elimizdiń, sondaı-aq fýtboldyń otany Anglııanyń jetekshi mamandarynan tálim alady. Fýtbol – jankúıeri mol, kópshilikti qamtıtyn sport túri. Zamanaýı tehnologııalardyń kómegimen otandyq fýtboldy jańa deńgeıge kóterip, jahannyń úzdigi atanatyn daryndardy baptaı alamyz dep senemin, – dedi M.Lomtadze.
Sport ınfraqurylymyn damytyp, ındýstrııaǵa basa kóńil bólýdiń ıgiligi mol. Elimizdegi ózge fýtbol klýbtary da keleshekte jeke ınvestordyń ıeligine ótip, órisin keńeıtýdi oılastyrǵany abzal.
