Munaıly aýdanynda ótken «Zero Waste Aktau» turmystyq qatty qaldyqtardy jınaý, shyǵarýǵa arnalǵan jańa arnaıy tehnıkalarynyń tanystyrylymyna Mańǵystaý oblysynyń ákimi Nurdáýlet Qılybaı qatysty.
Oblys ákimi baspasóz qyzmetiniń habarlaýynsha, tanystyrylymda 2025 jyly satyp alynǵan «Dongfeng» markaly 25 qoqys tasymaldaý avtokóligi, kólemi 1,1 tekshe metr bolatyn 2100 dana eýro-standarttaǵy konteıner usynyldy. Turmystyq qatty qaldyqtardy jınaý, nyǵyzdaý, tasymaldaýǵa arnalǵan sońǵy úlgidegi avtokólikter joǵary júk kótere alatyn, únemdi, qaladaǵy qarqyndy jumysqa beıim. Tyǵyz jabylatyn qaqpaǵy bar konteınerler qaldyqtardy jınaý úderisin ońtaılandyryp, jaǵymsyz ıistiń taralýyna jol bermeıdi. Qazirde 400-ge jýyq konteıner ornatylǵan, jyl sońyna deıin 2100 konteınerdi tolyq ornatý josparlanyp otyr. Bul jańa tehnıkalardyń taǵy bir ereksheligi – elimizde qurastyrylǵan, qaldyqtardy basqarý júıesiniń tıimdiligin arttyrýǵa, ekologııalyq qaýipsizdikti qamtamasyz etýge baǵyttalǵan «Jasyl damý» ulttyq jobasy aıasyndaǵy ınvestısııalyq joba sheńberinde satyp alynǵan.
Jańa tehnıkalardyń tanystyrylymy aıasynda Aqtaý qalasynyń ákimdigi men «Zero Waste Aktau» arasynda qaldyqtardy jınaý, shyǵarý qyzmetin jańǵyrtýǵa baǵyttalǵan kelisimshart jasalǵany aıtyldy. Kelisim aıasynda qala aýmaǵy zamanaýı eýro-standartqa saı konteınerlermen, arnaıy tehnıkalarmen kezeń-kezeńimen jabdyqtalyp jatyr.
Tazalyqqa qatysty shara «Taza Mańǵystaý» 45 kúndik áleýmettik-ekologııalyq chellendjiniń saltanatty jabylý rásimimen jalǵasty. О́ńir turǵyndarynyń ekologııalyq mádenıetin arttyrýǵa, qorshaǵan ortany qorǵaýǵa baǵyttalǵan chellendjdiń jabylýy sharasy barysynda aımaq basshysy N.Qılybaı ekologııalyq jaýapkershiliktiń mańyzdylyǵyna toqtalyp, turǵyndardyń belsendiligin erekshe atap ótti.
«Taza Mańǵystaý» – bul bir rettik aksııa emes, ekologııalyq mádenıetti qalyptastyratyn qoǵamdyq qozǵalys. Tabıǵatty qorǵaý ár adamnyń kúndelikti ómir saltyna aınalýǵa tıis. Kishkentaı qadamdar arqyly úlken ózgeristerge qol jetkizýge bolady», dedi ol.
Oblysta ekologııalyq aksııaǵa jyl basynan beri 130 myńnan astam adam qatysty. 31 757 túp aǵash otyrǵyzyldy. 39 myń tonnadan astam qoqys arnaýly oryndarǵa shyǵarylyp, qorshaǵan ortany abattandyrý jumystary júıeli túrde júrgizilip keledi.
О́ńirde 45 kún boıy óńir turǵyndary, jastar, eriktiler men eńbek ujymdary tazalyq jumystaryna belsendi atsalysyp, aǵash otyrǵyzý, qoqys jınaý, qaldyqtardy suryptaý, sý men elektr qýatyn únemdeý baǵytynda naqty ister atqardy. Chellendjge oblysta 77 komanda qatysty. Áleýmettik jelilerde 2 600-den astam ekologııalyq aqparat jarııalandy. Jobaǵa tikeleı 500-den astam adam tartylyp, qosymsha 2 myńǵa jýyq turǵyn ekologııalyq aksııalarǵa úles qosty.
Jabylý saltanatynda «Taza Mańǵystaý» 45 kúndik ekochellendjiniń jeke, ujymdyq sanattardaǵy jeńimpazdary, sondaı-aq «Úzdik aýla – 2025», «Úzdik turǵyn úı kesheniniń aýlasy», «Úzdik bıznes-aýmaq», «Úzdik kireberis», «Úzdik aýla sypyrýshy» baıqaýlarynyń jeńimpazdary marapattaldy.
Tazalyq – jekeniń emes, kóptiń jaýapkershiligi, sondaı-aq bir kúnniń emes tirshiliktiń tynysy. Tazalyqty júrgizý de, saqtaý da kópke ortaq mindet.
Mańǵystaý oblysy
