Sahna mádenıetin, kásibı jaýapkershilikti, kórkemdik tazalyqty bıik deńgeıge kóterip qana qoımaı, akter mamandyǵynyń kıeli ekendigin óz ómirimen dáleldegen jan. Ártis somdaǵan ár ról – ýaqyttyń aınasy, halyq taǵdyrynyń kórkem shejiresi. О́ner ıesi sahnaǵa shyqqan sátten bastap kórermen úshin jaı ǵana keıipker emes, ulttyń minez-bolmysyn, arman-muratyn arqalaǵan tulǵaǵa aınalatyn. Ár beınesi – tarıh, ár sózi – akterlik mektep, ár qadamy – ónerge adaldyqtyń úlgisi.
60-jyldardyń basynda qazaq teatr men kıno ónerine naǵyz janartaý bolyp kelgen talantty ártis kóp uzamaı shyn máninde sahnadaǵy qubylysqa aınaldy. M.Áýezovtiń «Abaı» tragedııasyndaǵy Aıdar beınesimen «tusaýy kesilgen» jas Asanáliniń sahnadaǵy seriktesteri shetinen óner alyptary edi. Al ustazy – ataqty Asqar Toqpanov pen rejıssýra reformatory Ázirbaıjan Mámbetov boldy. Sol uly býynnyń batasyn alyp, qoldaýyn kórgen akter óner jolyn bıik jaýapkershilikpen bastady.
Akterlik ónerdiń kórkemdik deńgeıin bıiktetken Asanáli Áshimov ult klassıkteri dramatýrgııasyndaǵy keıipkerler arqyly ult muraty men halyq taǵdyryn ómirsheń bolmysymen órnekteı bildi. Sondyqtan da Kebek, Qodar, Jarasbaı, Aıshýaq, Syrym batyr, Amangeldi, Elaman sekildi sahnalyq beıneler galereıasy – qazaq teatrynyń baǵa jetpes qazynasy.
Al kınodaǵy Bekejan beınesi – ult óneri hrestomatııasyna aınalǵan máńgilik obraz. Asanáli Áshimov Bekejan taǵdyry arqyly ulttyq minezdiń kúrdeliligin, tragedııasyn, asqaqtyǵyn halyq júregine shynaıy jetkize bildi. Sháken Aımanovtyń «Atamannyń aqyry» fılminen bastalyp, «Transsibir ekspresi», «Bulǵar dalasynan esken jyly jel», «Siz kimsiz, Ka myrza?», «Arýaq» týyndylaryna jalǵasqan beıneleri – kınodaǵy óz aldyna jańa bir beles, kórkemdik deńgeı qalyptastyrǵan qaıtalanbas rólder.
Asanáli Áshimovtiń sýretkerlik bolmysynyń taǵy bir bıik qyry – rejıssýrasy men ustazdyǵy. Teatr pedagogıkasynda qaıtalanbas úni, ózindik mashyǵy, aıshyǵy men órnegi qalyptasty. Abyz akter jas ónerpazdarǵa baǵyt-baǵdar berip, rýhanı sabaqtastyqtyń saqtalýyna zor eńbek sińirdi. О́nerdiń jaýapkershiligin, sahnanyń kıesin shákirtteriniń júregine sińire bildi. Shákirtteri úshin ol tek tálimger ǵana emes, ónerdegi ar-ojdannyń, azamattyq bıiktiktiń úlgisi boldy. Teatrdyń kórkemdik baǵyt-baǵdaryn aıqyndap, ulttyq sahnanyń bedelin bıiktetti.
Ol halyqtyń jadynda, kórermenniń júreginde, sahna tórinde máńgilikke qaldy. Onyń amanaty – ónerge adaldyq, ultqa qyzmet etý, rýhty saqtaý – ónege bolyp qala beredi. Qosh bolyńyz, ult óneriniń qara nary!
«Qazaq gazetteriniń» qalamgerleri
