Sýret: stan.kz
Asanáli jaı áriptes emes, týysymdaı, birge týǵan baýyrymdaı bolyp ketken jan edi. Qazaqstannyń túkpir-túkpirinen oqýǵa kelgen talantty jastardyń ishinde tulǵasy menmundalap, daralanyp turatyn. Shashy buıralanǵan, janary otty, óte qaǵilez, symbatty jigittiń aýyldan kelgenine senbeıtinbiz.
Asanáli teatr men kıno salasynda tel óner kórsetip, qaıtalanbas obrazdarymen qalyń kórermenniń qurmetine bólendi. Eldiń súıikti uly boldy. Qanshama qıyn taǵdyrdy basynan keshse de, synyp ketpedi. Konservatorııanyń teatr fakýltetinde birge oqyǵan qyz-jigitterdiń ishinde ómirde Asanáli Áshimov, Sábıt Orazbaev úsheýmiz ǵana qalyp edik. Endi Asanáli joq. Qaraly habar qabyrǵamyzdy qaıystyryp ketti.
Qalaı ǵana arystaı tulǵamyzdan kóz jazyp qaldyq? «Basym aýyrdy» dep bir ret te shaǵymdanbaǵan edi ǵoı. Úsh-tórt kún buryn telefonmen sóıleskende bári jaqsy demep pe edi? Ne aıtarymdy da bilmeımin!
Alash jurty syrty qatal kóringenimen, ishi maqpaldaı jumsaq júrekti, óner úshin týǵan uly ulynan aıyryldy. Men aldymen halqyma kóńil aıtqym keledi.
Baqul bol, Asanáli baýyrym!
Núketaı Myshbaeva,
Qazaqstannyń Halyq ártisi
