Foto: Úkimettiń baspasóz qyzmeti
«Atalǵan baǵdarlamaǵa sáıkes biz jaı ǵana sýbsıdııa bólý ádisinen, óńirlerdiń ortaq jaýapkershiligi modeline kóshemiz. Bizdiń maqsatymyz tek nesıe berý emes, turaqty óndiris quryp, ónim shyǵarý kóleminiń naqty ósimin qamtamasyz etý», dedi Premer-mınıstr.
Qarjy mınıstrligine «Isker aımaq» baǵdarlamasyn qarjylandyrýdy qamtamasyz etý tapsyryldy. Baǵdarlamany jergilikti bıýdjetter esebinen de qosa qarjylandyrý kózdelýi qajet. О́ńir ákimdikteri birinshi deńgeıdegi sýbsıdııalardy (bıýdjettiń 70%-y) bólý úshin aýdandardyń ereksheligin eskere otyryp, barynsha qysqa merzimde basym salalardyń tizbesin ázirleý kerek.
Sondaı-aq Úkimet basshysy jańa Bıýdjet kodeksine sáıkes shaǵyn bıznesten túsetin barlyq salyq túsimi ákimdikterdiń ıeliginde qalatynyn atap ótti.
«Jańa Bıýdjet kodeksi shaǵyn bıznesten túsetin barlyq salyq túsimin ákimdikterdiń ıeliginde qaldyrýdy kózdeıdi. Endi ákimder árbir kásipkerdiń tabysqa jetýine múddeli bolady. О́ıtkeni ol jergilikti bıýdjet kiristeriniń ósýine tikeleı yqpal etedi», dedi Oljas Bektenov.
Aıta keteıik, elimizde kásipkerlerge tegin býhgalterlik keńes beretin «Halyq býhgalteri» aksııasy bastalady.
