Foto: Qýyrshaq teatrynyń baspasóz qyzmeti
Sonymen qatar aldaǵy jyldary Semeı, Qonaev jáne Aqtóbe qalalarynda jańa drama teatrlar boı kóteredi.
Búgingi tańda Almaty qalasyndaǵy Muhtar Áýezov atyndaǵy Qazaq ulttyq drama teatry men Natalııa Sas atyndaǵy Memlekettik akademııalyq orys balalar men jasóspirimder teatrynda jóndeý jumystary júrip jatyr.
Salalyq mınıstrlik mádenı nysandardyń ınfraqurylymyn jańartý máselesine den qoıyp otyr. Bıyl Kúlásh Baıseıitova atyndaǵy Qazaq ulttyq óner ýnıversıtetiniń bas korpýsy qaıta jańardy. Temirbek Júrgenov atyndaǵy О́ner akademııasyna arnalǵan jańa jataqhana qurylysy bastaldy. Budan bólek, iri qalalarda úsh jańa óner mektebiniń ınfraqurylymyn jańartý máselesi pysyqtalyp jatyr.
Bıyl barlyǵy 61 mádenı nysan salynǵan. О́ńirlerde 251 nysanǵa jóndeý jumystary júrgizilip jatyr. Sondaı-aq elorda tarıhyn zertteýdiń mańyzdy ortalyǵyna aınalatyn «Bozoq» arheologııalyq parkin qurý jumystary qarqyn alǵan.
Mınıstrlik mádenıet qyzmetkerlerine áleýmettik qoldaý kórsetýge erekshe mán beredi. Azamattyq qyzmetkerlerdiń keı sanattary boıynsha jalaqyny kezeń-kezeńimen kóbeıtý kózdelgen. 2022 jyldan 2025 jylǵa deıin mádenıet jáne arhıv uıymdarynda jumys isteıtin 64 myń qyzmetkerdiń jalaqysy jyl saıyn 20%-ǵa artty. Memleket óner salasynda qyzmet etetin mamandardy stıpendııalar men marapattar arqyly qoldaýdy jalǵastyrady. Jyl basynda 75 mádenıet qyzmetkeri memlekettik stıpendııaǵa ıe boldy. Prezıdent Jarlyǵyna sáıkes birqatar azamat Qazaqstan mádenıetin damytý men nasıhattaýǵa qosqan úlesi úshin marapattaldy.
Solardyń qatarynda elimizdi álemge tanytyp júrgen opera ánshisi Marııa Mýdrıak bar. 2025 jyly Memleket basshysynyń Jarlyǵymen oǵan «Qazaqstannyń eńbek sińirgen qaıratkeri» ataǵy berildi.
«Men úshin Qazaqstannyń marapatqa laıyq sanaǵany – úlken qurmet. Prezıdentimizge alǵys bildiremin. Bıyl shyǵarmashylyǵyma 28 jyl toldy. Men Qazaqstandy álemniń eń iri opera sahnalarynda zor maqtanyshpen tanystyryp, aldaǵy ýaqytta da el ıgiligi úshin aıanbaı qyzmet etemin», dedi ánshi.
Osy ózgeristerden bólek birqatar jetekshi mádenıet mekemelerine «Akademııalyq» mártebe berildi. Atap aıtsaq, Taldyqorǵan qalasyndaǵy B. Rımova atyndaǵy drama teatry, Almaty memlekettik qýyrshaq teatry, Jambyl oblystyq A.Toqpanov atyndaǵy qazaq drama teatry, Batys Qazaqstan oblystyq Ǵ.Qurmanǵalıev atyndaǵy fılarmonııasynyń mártebesi ózgerdi.
