Ońaltý ortalyǵynyń ashylý rásimine oblys ákimi Qumar Aqsaqalov pen «Qazaqstan halqyna» qoǵamdyq qorynyń basqarma tóraǵasy Lázzat Shyńǵysbaeva qatysty. Oblys ákiminiń aıtýynsha, buǵan deıin óńirde balalarǵa arnalǵan jalǵyz ońaltý ortalyǵy bolǵan.
«Ol jylyna 400 balaǵa deıin qabyldaıdy. Al jańadan ashylyp otyrǵan ortalyqtyń qyzmet kórsetý aıasy odan eki ese kóp. Onyń syrtynda, joǵary deńgeıdegi zamanaýı medısınalyq qurylǵylarmen jabdyqtalǵan. Tıisti daıarlyqtan ótken bilikti mamandar jumys isteıdi. Bizge «Qazaqstan halqyna» qory zor kómek kórsetti. 1 mlrd teńgeden astam qarjy bólip, oǵan bizde buryn-sońdy bolmaǵan óte sırek qurylǵy-jabdyqtarmen qamtydy. Buryn mundaı tehnologııa elorda men Almatyda bolǵandyqtan, ata-analar sol iri qalalarǵa qatynaýǵa májbúr bolatyn. Endi bundaı múmkindik ózimizde paıda bolyp otyr», dedi Qumar Aqsaqalov.
Lázzat Shyńǵysbaeva «Qazaqstan halqyna» qoǵamdyq qory Qostanaı oblysyna 21 mlrd teńgege jýyq qarjy bólip, áleýmettik salany damytatyn irgeli jobalardy iske asyryp jatqanyn aıtty. Sonyń aıqyn bir dáleli – osy ortalyq.
«Bul – «Altyn standart» boıynsha jasalǵan ortalyq. Nege biz elimizde joq jabdyqtardy ákeldik? О́ıtkeni áleýmettik salada óte mańyzdy standarttardy kóterýimiz kerek. Sol arqyly qyzmet sapasy artýy qajet. Búgin biz kórip otyrǵan qural-jabdyqtarǵa 700 mln teńge jumsaldy. Qalǵandary kelisimsharttar aıasynda Japonııa, Shveısarııa, AQSh, Aýstralııa sııaqty elderden kele jatyr. Álemdik brendter tapsyryspen bizge arnaıy jasalady. Degenmen qolda bar tehnıkalar jumysty tolyq bastaı berýge múmkindik beredi. Mundaǵy qamtylym jerge qonǵan ǵaryshkerdi ońaltýǵa qajetti jabdyqtardan esh kem emes», dedi Lázzat Shyńǵysbaeva.
Burynǵy Prezıdent rezıdensııasyna ornalasqan ońaltý ortalyǵynyń jeti ǵımaraty bar.
