Kitaptyń tusaýkeseri Almaty qalasyndaǵy «Armııa úıinde» ótti. Saltanatty jıynǵa qaladaǵy áskerı oqý oryndarynyń ofıserleri men kýrsanttary qatysyp, batyr rýhyna taǵzym jasady. Is-sharaǵa Respýblıkalyq «Generaldar keńesi» qoǵamdyq birlestiginiń tóraǵasy, general-leıtenant Beksultan Sársekov moderatorlyq etti.
Aıta ketý kerek, budan bir kún buryn general-maıor, Qazaqstan Jazýshylar odaǵynyń múshesi Erjan Isaqulovtyń Baýyrjan Momyshuly týraly maqalasy jaryq kórgen edi. Kóp uzamaı Memleket basshysynyń pármenimen batyrǵa «Halyq qaharmany» ataǵy resmı túrde berildi. Bul tarıhı ádilettiń ornaýy, ulttyq jadtyń jańǵyrýy retinde qabyldandy.
Tarazdaǵy áskerı mektep-ınternatqa Baýyrjan Momyshulynyń esimi beriledi
10 tomdyq eńbektiń avtory Mamytbek Qaldybaı Baýyrjan Momyshulymen jıyrma jyldan astam ýaqyt boıy etene aralasyp, onyń maıdan jyldaryndaǵy estelikterin, qolbasshylar men zamandastary týraly oı-tolǵamdaryn kózben kórip, qulaqpen estip, kóńilge túıgen azamat. Avtor batyrdyń erekshe minezin, týrashyldyǵyn, sheshendigin, eldik namysty bárinen bıik qoıatyn qaısar bolmysyn jan-jaqty zerdelegen. Soǵys pen beıbit ómirdegi árbir oqıǵadan oı qoryta biletin tereń parasaty da osy eńbekte keńinen ashylǵan.
Kóptomdyqta Baýyrjan Momyshulynyń Konstantın Rokossovskıı, Georgıı Jýkov, Aleksandr Vasılevskıı, Ivan Bagramıan, Ivan Panfılov, Aleksandr Fadeev, Alekseı Tolstoı, Muhtar Áýezov, Sábıt Muqanov, Ǵabıt Músirepov, Qanysh Sátbaev syndy áskerı qolbasshylar men rýhanııat alyptary týraly aıtqan áńgimeleri qamtylǵan. Bul derekterdiń qundylyǵy – resmı hronıkada emes, batyrdyń óz kózimen kórip, óz oı eleginen ótkizgen tiri tarıhynda jatyr. Sondyqtan jınaqtyń tárbıelik, tanymdyq salmaǵy aıryqsha.
Baýyrjan Momyshulyna «Halyq qaharmany» ataǵy resmı túrde berildi
Qaharman ómiriniń qatparly jolyn arqaý etken 10 tomdyq jınaq «Bekasyl áýlıe» jeke qorynyń demeýshiligimen Almaty qalasyndaǵy «Kerýlen Prınt» baspahanasynan jaryq kórdi. Bul eńbek bir tulǵanyń ǵumyrnamasy ǵana emes, tutas dáýirdiń rýhanı shejiresi deýge negiz bar.
Baýyrjan Momyshulynyń taǵdyry men taǵylymy búgingi urpaqqa áli talaı oı salady. Al sol rýhanı murany júıelep, hatqa túsirgen bul kóptomdyq ult jadynda uzaq saqtalary sózsiz.
