Kollajdy jasaǵan – Záýresh Smaǵul, «EQ»
Akselerasııa degenimiz – startaptardy jedel damytýǵa arnalǵan arnaıy baǵdarlama. Munda jas kásipkerler bıznes-modelin pysyqtap, ónimin naryqqa shyǵarýdyń joldaryn naqtylaıdy ári ınvestorlarmen baılanys ornatady. Ádette qatysýshylar tájirıbeli mentorlarmen birge jumys istep, marketıng, qarjylandyrý jáne tehnologııalyq damý boıynsha praktıkalyq bilim alady. Sonyń nátıjesinde startaptar az ýaqytta qarqyn alyp, jobasyn naqty ónimge aınaldyryp, ınvestısııa tartýǵa bir qadam jaqyndaıdy.
«Industrial AI Acceleration» baǵdarlamasy elimizdiń túkpir-túkpirindegi ónertapqyshtar men iri ónerkásip ókilderin bir alańda toǵystyrdy. Barlyǵy 90 ótinim túsken. Irikteý qorytyndysy boıynsha 43 komanda qabyldanyp, olardyń 38-i naqty óndiristik suranystarmen jumys isteýge kiristi.
«Baǵdarlamanyń maqsaty – tek akselerasııa ótkizý emes, startaptar men ónerkásip arasynda turaqty ári uzaqmerzimdi yntymaqtastyq júıesin qalyptastyrý. Búginde jasandy ıntellekt jáne IT-sheshimder tanystyrylym deńgeıinen ótip, óndiriste jumys isteı bastaǵanyn kórip otyrmyz», dedi «Astana Hub» Indýstrııa 4.0 ofısiniń dırektory Anarbek О́teǵulov.
Qorytyndy Demo Day aıasynda 33 komanda óz nátıjelerin kópshilik nazaryna usyndy. Baǵdarlama aıasynda sátti engizilgen jobalardyń biri – «SafeSight AI». Startap óndiristik qaýipsizdikti baqylaý úshin kompıýterlik kórý tehnologııasyn qoldanady. Mundaǵy beınebaqylaý kameralary arqyly júıe tehnıka qaýipsizdigi erejeleriniń buzylýyn, sondaı-aq qaýipti áreketterdi avtomatty túrde anyqtaıdy. «SafeSight AI» sheshimi munaı-gaz, taý-ken jáne aýyr ónerkásip salalarynda qoldanylyp, óndiristik jaraqattardy 20-40 paıyzǵa deıin azaıtyp otyr. Sonymen qatar eńbek qaýipsizdigine qatysty tekserýler men tergeýlerge ketetin shyǵyndar 30 paıyzǵa deıin qysqarady. Bul – jasandy ıntellektiniń óndiristegi qaýipsizdikti tek baqylaý emes, aldyn alý deńgeıine kótere alatynyn kórsetetin naqty mysal.
О́nerkásiptegi taǵy bir mańyzdy baǵyt – jabdyqtardyń jaı-kúıin úzdiksiz baqylaý. Bul baǵytta «RRLean» startaby erekshe kózge tústi. «RRLean» ázirlegen platforma «IIoT» jáne «Edge AI» tehnologııalaryna súıenip, óndiristik aktıvterdi dál sol sátinde baqylaıdy. Júıe jabdyqtyń isten shyǵý qaýpin aldyn ala boljap otyrady. Nátıjesinde, derekterdi rásimdeýge ketetin ýaqyt birneshe ese qysqaryp, qyzmetkerdiń jumys tıimdiligi artady. Bul sheshim iri óndirister úshin ýaqyt pen shyǵyndy qatar únemdeýdiń tıimdi jolyna aınalyp otyr.
О́ndiristegi sıfrlandyrý tek jabdyqpen shektelmeıdi. Jumysshynyń ózi de osy júıeniń mańyzdy bóligi. Sondyqtan «Tems.ai» startaby usynǵan «connected worker» platformasy da erekshe kózge tústi. «Tems.ai» óndiristik nusqaýlyqty, chek-paraqty, beınematerıaldardy bir sıfrlyq ortaǵa jınaqtaıdy. Qyzmetker qajetti aqparatty dál sol sátte, naqty jumys ornynda ala alady. Generatıvti Jı men NLP tehnologııalary arqyly júıe aqparatty qurylymdap, ony jańartyp otyrady. Sonyń nátıjesinde nusqaýlyq ázirleý ýaqyty 90 paıyzǵa deıin qysqaryp, jabdyqtardyń bos turýy aıtarlyqtaı azaıady.
Baǵdarlamada aýyr ónerkásipke baǵyttalǵan tereń tehnologııalyq sheshimder de usynyldy. Sonyń biri – «METACODE» ázirlegen SKD júıesi. Bul sheshim baıytý fabrıkalary men metallýrgııalyq kásiporyndarǵa arnalǵan. Qarapaıym tilmen aıtsaq, atalǵan júıe kásiporyndaǵy flotasııa úderisiniń qalaı júrip jatqanyn únemi qadaǵalap, qandaı ózgeris bolýy múmkin ekenin aldyn ala kórsetedi. Sonyń arqasynda reagentterdi artyq ta emes, kem de emes, dál mólsherleýge múmkindik týady. Nátıjesinde, óndiris turaqtanyp, mys pen altyn alý kólemi 0,5–1 paıyzǵa deıin ósedi. Al bul iri zaýyttar úshin jylyna ondaǵan mln dollar qosymsha tabys ákelýi múmkin.
О́nerkásiptegi tıimdilik tek sehtaǵy stanoktyń jumysymen ólshenbeıdi. Kásiporynnyń ishki basqarýy da júıeli bolsa ǵana ýaqyt únemdelip, shyǵyn azaıady. Osy baǵytta «ZIZ INC» startaby usynǵan sheshim nazar aýdararlyq. Kompanııa kásiporyndaǵy negizgi úsh júıeni – tutynýshylarmen jumys (CRM), kadrlyq basqarý (HRM) jáne qarjy-esep, josparlaý (ERP) platformalaryn bir ortaǵa biriktiredi. Qarapaıym tilmen aıtqanda, ár bólimniń aqparaty bytyrańqy bolmaı, bir jerde kórinedi, sonyń arqasynda kóptegen jumys avtomatty túrde oryndalady. Sonyń nátıjesinde buryn qolmen jasalatyn operasııalar qysqarady, qujat kelisý, tapsyrma berý, baqylaý sııaqty jumystar 2–3 ese jyldam júredi. Buǵan qosa, startap AR jáne VR tehnologııalaryn paıdalanyp, qyzmetkerlerdi oqytýdy da jańasha uıymdastyrady, ıaǵnı maman óndiristegi jaǵdaıdy vırtýaldy ortada «kórip», qaýipsiz túrde tájirıbe jınaı alady. Bul sıfrlandyrýdyń tek tehnıkaǵa emes, eń bastysy – adam resýrsyna, mamandardyń biliktiligine tikeleı áser etetinin kórsetedi.
Al «shai.pro» startaby kompanııa ishindegi jumysqa beıimdelgen JI-agentter platformasyn tanystyrdy. Bul – kásiporynnyń kúndelikti «qaǵazbasty» sharýasyn jeńildetip, táýekeldi azaıtýǵa kómektesetin sıfrlyq qural. Platforma táýekelderdi basqarý, talaptarǵa sáıkestik, qujat aınalymy jáne derekterdi durys óńdeý sııaqty baǵyttarǵa arnalǵan. Bylaısha aıtqanda, júıe kompanııanyń ishki qujattaryn, kelisimsharttaryn, esepterin «oqyp», kerek aqparatty tez tabady, salystyrady jáne naqty usynys beredi. Sonyń arqasynda platforma ınternetten jınalǵan jalpy jaýapqa emes, kásiporynnyń naqty qujattaryna negizdelgen sheshim usynady. Iаǵnı jasandy ıntellekt munda jaı ǵana kómekshi emes, basqarýshylyq sheshim qabyldaýǵa yqpal etetin deńgeıge kóteriledi.
Osylaısha, Industrial AI Acceleration 2025 baǵdarlamasy jasandy ıntellektiniń óndiriste jaı «tájirıbe» emes, naqty nátıje beretin quralǵa aınalǵanyn aıqyn kórsetti. Endigi mindet – mundaı sheshimderdi jekelegen jobalar deńgeıinde qaldyrmaı, kásiporyndardyń kúndelikti jumysyna keńinen engizip, startap pen ındýstrııa arasyndaǵy baılanysty turaqty júıege aınaldyrý.
