Shyǵarmashylyq keshtiń shymyldyǵy Gúlzeınep Sádirqyzynyń qalamynan týǵan «Nálet», «Aıbıbi», «Áıel jany», «Qatal úkim» atty otbasylyq ómirdiń shynaıy bet-beınesin baıandaıtyn áńgimeler men povester jelisine qurylǵan qysqasha qoıylymdarmen túrildi. Ár taqyrypqa arqaý bolǵan qazaq áıeliniń kónbistigi, meıirimdiligi men qatal taǵdyrǵa tózimdiligin «Súıinbaı» halyq teatry ártisteriniń jandy beıneleýi, janarǵa jas úıirdi. Jýrnalıstik jolda qıyn da kúrdeli taǵdyr ıelerimen júzdesip, olardyń turmys-tirshiligin júrek súzgisinen ótkizgen qalamgerdiń bul týyndylary esh boıamasyz shynaıy kestelenip, oqyrman júregine jetkeni aqıqat.
Kórermenge teatr tamashalaǵandaı ádemi áser qaldyrǵan saltanatty sharanyń ekinshi bólimi mereıtoı ıesine arnalǵan aqjarma tilekterge jalǵasty. Jetisý oblystyq «Jetisý» radıosynyń basshysy, «Altyn tobylǵy» jáne «Altyn qalam» júldesiniń ıegeri, jazýshy Esbolat Aıdabosyn tizgindegen ádebı-sazdy keshtiń alǵashqy sóz tıegin Parlament Senatynyń depýtaty, memleket jáne qoǵam qaıratkeri Darhan Qydyráli aǵytty. Júrekjardy lebizinde qalamy júrdek jýrnalıstiń otandyq buqaralyq aqparat quraldaryn damytýǵa qosqan úlesin aıryqsha ataı kele, Gúlzeınep Sádirqyzyna Parlament Senatynyń Qurmet gramotasyn tapsyrdy. Sonymen qatar Prezıdent keńesshisi Málik Otarbaevtyń jyly lebizin jetkizdi.
«Gúlzeınep ápkemiz «Egemen Qazaqstan» gazetine alǵash stenografıst bolyp jumysqa qabyldanǵan. Sóıte júrip óziniń jazý stılin qalyptastyrdy. Qalamynan týyndaǵan áleýmet, saıasatqa qatysty ótkir de ózekti taqyryptary Parlament minberinen depýtattyq saýal retinde joldanyp, eldik máselelerdiń sheshim tabýyna ún qosty. Jalpy, qazaq áıeli degende – ásemdiktiń, sulýlyqtyń, adaldyqtyń, beınetkeshtiktiń, tózimdiliktiń, meıirbandyqtyń kelbeti keledi. Gúlzeınep Sádirqyzy – ózi de, sózi de kórkem, jany da, jazýy da sulý jýrnalıst-jazýshy. Kúrmeýi qıyn kúrdeli máseleni de gazet betinde qyzdyń jıǵan júgindeı etip kórsete bildi. Ekinshiden, otbasyna, kásibine, ózi 45 jylǵa jýyq jumys istegen «Egemen Qazaqstan» gazetine adaldyǵyn atar edim. Qazaqtyń qabyrǵaly qalamgerleriniń tálimin aldy, tájirıbesin ushtady», degen Darhan Qydyráli jýrnalıst Gúlzeınep Sádirqyzy úlken júrekti, qazaqtyń qaısar qyzy ekenin aıryqsha atady. Jany názik jýrnalıstiń ózi shekpeninen shyqqan Halyq jazýshysy Sherhan Murtazaǵa jasaǵan qamqorlyǵyn mysal etti.
Saltanatty sharada Premer-mınıstrdiń orynbasary – Mádenıet jáne aqparat mınıstri Aıda Balaevanyń mereıtoı ıesine joldaǵan quttyqtaý hatyn «Qazaq gazetteri» JShS Almaty fılıalynyń basshysy Baǵashar Tursynbaıuly oqyp berdi. Quttyqtaý hatta: «О́zińizdi ulttyq jýrnalıstıkada óz qoltańbasyn qalyptastyryp, qazaq baspasóziniń mazmunyn baıytqan qalamger retinde qurmetteımiz. Kóp jyl ǵasyrlyq tarıhy bar «Egemen Qazaqstan» gazetinde áleýmet, rýhanııat, mádenıet salalaryndaǵy ózekti máselelerge qalam terbep, otandyq aqparat keńistiginiń damýyna eleýli úles qostyńyz. Qalamyńyzdan týǵan prozalyq shyǵarmalaryńyz oqyrman oljasyna aınalyp, ádebıetsúıer qaýymnyń shynaıy qurmeti men yqylasyna bólenip kelesiz. Mereıli jasyńyzben quttyqtaı otyryp, sizge zor densaýlyq, shyǵarmashylyǵyńyzǵa tolaıym tabys, áýletińizge amandyq pen baıandy baq tileımin!», delingen.
О́z kezeginde óńir basshysynyń ystyq yqylasyn jetkizgen oblys ákiminiń orynbasary Ǵanı Maılybaev ta jýrnalıst G.Sádirqyzynyń qalamyna adaldyǵy men eńbekqorlyǵyn erekshe atap ótti. Al aqyndar men batyrlar eli atanǵan Jambyl aýdanynyń ákimi Nurlan Ertasuly sahna tórinde Gúlzeınep Sádirqyzyna qazaqy dástúrmen syı-qurmet kórsetti.
Minbede sóz alǵandar qatarynda belgili aqyn, áıgili «Kók týdyń jelbiregeni» atty ánniń sózin jazǵan Almas Ahmetbekuly qandastar atynan sóz alyp, Gúlzeınep Sádirqyzynyń kóshi-qon saıasatyn synǵa alǵan «Kósh-kerýen keri burylyp ketpese eken...» atty maqalasyn dúnıejúzi qazaqtary qalaı jyly qabyldaǵanyn, jýrnalıstik paıymy men qalamynyń qarymy syrttan keletin qandastar týraly zań qabyldaýǵa qalaı áser etkenin mysal etti. Sóıtip, Gúlzeınep Sádirqyzyn «memlekettik saıasatqa ózgeris ákelgen jýrnalıst» dep baǵalap, qandastar atynan at mingizdi.
Shyǵarmashylyq keshke esimderi elge tanymal «egemendik» Jumagúl Solty, Súleımen Mámet, Kúmisjan Baıjan, Qorǵanbek Amanjol, Talǵat Súıinbaı, Saıasat Beıisbaı, Serik Pirnazar syndy ardager-jýrnalıster men qazirgi qyzmetkerlerdiń bir toby qatysty. Áriptester atynan sóz alǵan «Egemen Qazaqstan» gazetiniń bas redaktory Ǵabıt Músirep aldymen «Qazaq gazetteri» JShS dırektory Dıhan Qamzabekulynyń arnaıy quttyqtaýyn tapsyrdy. Onda Gúlzeınep Sádirqyzyn kásibı turǵyda eleýli úles qosqan qalamger retinde erekshe baǵalaıtyny, «Perzenthana perdesi... talaı syrdy búrkep tur» atty serııalyq maqalalarynan bastap, «Aıdalada aq otaý», «Aty ǵana ardaqty ma?», «Ákesi ólgen qandaı-dy», basqa da kólemdi problemalyq maqalalarynyń qoǵamǵa qozǵaý salǵanyn atady.
«Bul atalǵan gazettiń sol kezdegi tilshisiniń qalamynan týǵan maqalalarynyń ózektiligin kórsetedi. Osyndaı talantty perzentterin ardaqtap otyrǵan aqyndar men batyrlar eliniń jurtshylyǵyna myń alǵys», dedi bas redaktor.
Proza janryndaǵy shyǵarmashylyǵy men ereksheligi de keńinen sóz boldy. Bul oraıda Jazýshylar odaǵynyń hatshysy, Ál-Farabı atyndaǵy Qazaq ulttyq ýnıversıtetiniń professory Qanseıit Ábdezuly, kórnekti synshy, jazýshy Ámirhan Meńdeke oralymdy oı-pikirlerin ortaǵa saldy. Mereıtoı ıesine Jazýshylar odaǵynyń músheligine qabyldanǵany týraly kýálik pen tósbelgisin tapsyrdy.
«Jambyl eliniń qolyna qalam ustaǵan perzentteri taǵy jıylyp, qazaqtyń talantty jýrnalısine, qalamgerine qurmet kórsetip otyrsyzdar. О́te rızamyn. Bul – eldiń toıy. Mine, osy qasıetti topyraqtan túlep ushqan Gúlzeınep Sádirqyzynyń da qýatty qalamy qazaq rýhanııatynyń qorjynyn qundy shyǵarmalarmen baıytyp otyr», dedi Ál-Farabı atyndaǵy Qazaq ulttyq ýnıversıtetiniń professory Qanseıit Ábdezuly.
Ádebı-sazdy keshte «О́lke tynysy» JShS dırektory, belgili aqyn Kádirbek Qunypııauly jyrdan shashý shashsa, Jýrnalıster odaǵynyń oblystyq fılıalynyń basshysy, «Alataý araıy» gazetiniń bas redaktory Qýanysh Tuńǵatar da izgi tilegin jetkizdi.
Áýezdi ánmen órilgen saltanatty shara sońynda qalamger Gúlzeınep Sádirqyzynyń «Áıel jany» atty prozalyq jınaǵy men «Qanekeı, qalam, sóıleshi» kitaptarynyń tusaýy kesildi. Kitap oblys ákimdiginiń qoldaýymen jaryq kórdi.
Búginde qalamger shyǵarmalaryna ózek bolǵan Aqterek aýyly kórkeıip keledi. Oǵan tól perzentiniń qosqan úlesi az emestigin jerlesteri atynan sóz alǵan «Aqterek» sharýa qojalyǵynyń tóraǵasy, aýdannyń qurmetti azamaty Temirlan Shaınúsipov atap aıtty. Sóıtip, áıel janynyń myń qatpar tereń ıirimderine boılap, qundy shyǵarmalar jazǵan jýrnalıst-jazýshy, «Aqqý ǵumyrly taǵdyr», «Mahabbatym júregimde», «Taý tulǵa», «Alqa» baspasy muryndyq bolǵan ádebı baıqaýdyń bas júldesin qanjyǵalaǵan «Aıbıbi» áńgimeler men povester jınaǵynyń avtory, Jýrnalıster, Jazýshylar odaǵynyń múshesi Gúlzeınep Sádirqyzynyń mereıtoıyn óner maıtalmandary Baǵdat Sámedınova, Uljan Aınaqulova bastaǵan sahna sańlaqtary ásem ánmen árledi, júrekterdi terbedi.
Almaty oblysy,
Jambyl aýdany
