Aýrýy asqynyp, ábden sharasy taýsylǵan naýqasqa shuǵyl júrek transplantasııasy qajet bolǵandyqtan, mamandar ony respýblıkalyq kútý paraqshasyna engizgen edi. Donor – arterııalyq gıpertenzııanyń aýyr túrine shaldyǵyp, ınsýlt alǵan 50 jastaǵy áıel adam. Naýqas jedel túrde Ortalyq qalalyq klınıkalyq aýrýhanaǵa jetkizilgende dárigerler konsılıýmy onyń mıy semgenin anyqtap, qaıtys bolǵannan keıingi donorlyqqa jaramdylyǵyn rastady. Marqumnyń týystary kelisimin bergen soń, jedel donorlyq júrekti alý operasııasy bastaldy. Densaýlyq saqtaý mınıstrligine qarasty Transplantasııa jáne joǵary tehnologııalyq medısınalyq qyzmetterdi úılestirý jónindegi respýblıkalyq ortalyq osy úderistiń barlyq kezeńin óz mindetine aldy.
Almaty qalalyq kardıologııalyq ortalyǵy júrgizgen alǵashqy júrek aýystyrý operasııasy bes saǵattan astam ýaqytqa sozylyp, oıdaǵydaı aıaqtaldy. Transplantasııalyq operasııany ortalyq pen UMC korporatıvtik qorynyń mamandarynan quralǵan kásibı dárigerler jasady. Kúrdeli úderiske qalalyq júrek ortalyǵynyń dırektory Ermaǵanbet Qýatbaev pen UMC basqarma tóraǵasy, professor Iýrıı Pıa jetekshilik etti. Aıta ketý kerek, UMC komandasy aqparat túsken boıda Almatydaǵy áriptesterine qoldaý kórsetý maqsatynda jedel túrde ushyp keldi.
Iýrıı Vladımırovıch ortalyq ujymyn tarıhı oqıǵamen quttyqtap, onyń Almatydaǵy kardıohırýrgııanyń jańa kezeńge qadam basýyna jol ashqanyn atap ótti. Sondaı-aq ol donordyń jaqyndaryna kóńil aıta otyryp, olardyń sheshimi talaı jannyń ómirin saqtap qalǵanyna erekshe toqtaldy.
Osy qarasha aıynda ǵana resmı túrde júrek transplantasııasyn júrgizýge quqyly medısınalyq uıymdar tizimine engizilgen Almaty qalalyq kardıologııalyq ortalyǵynda barlyq jaǵdaı jasalǵan, halyqaralyq standarttarǵa saı jabdyqtar ornatylǵan. Dıagnostıka men emdeýdiń ozyq tásilderi qoldanylady. Joǵary bilikti kardıolog, kardıohırýrg, anestezıolog-reanımatolog, perfýzıologter, operasııa jasasýǵa beıimdelgen bilikti meıirbıkeler qyzmet etedi.
– Transplantologııa baǵdarlamasyna qosylý – pasıentterdiń ómirin uzartýǵa, sapasyn arttyrýǵa baǵyttalǵan mańyzdy qadam. Bul tek medısınanyń damý deńgeıin emes, qoǵamnyń da donorlyq mádenıetke daıyn ekendigin kórsetedi, – deıdi E.Qýatbaev.
Týystarynyń ruqsatymen ózge donorlyq aǵzalar da paıdalanyldy. Qos búıregi Ulttyq ǵylymı hırýrgııa ortalyǵyna jóneltilip, bireýi 15 jastaǵy qyzdyń, ekinshisi 30 jastaǵy áıeldiń ómirin saqtap qaldy. Eki kózdiń qasań qabyqtary Ortalyq qalalyq klınıkalyq aýrýhanasynda transplantasııalandy.
Jalpy, bul – bıyl Almaty qalalyq klınıkalyq aýrýhanasynda tirkelgen tórtinshi mýltıorgandy donor. Birinshi máıittik donor naýryz aıynda shyǵyp, eki búıregi men júregi jańa ıelerin tapty. Ekinshi jaǵdaı maýsym aıynda tirkeldi. Donor bes pasıenttiń ómirin saqtap qaldy. Onyń da júrek, búırek, sondaı-aq qasań qabyqtary transplantasııalandy. Bul keratoplastıka arqyly eki operasııa jasaýǵa múmkindik berdi. Úshinshi mýltıorgandy donorlyq úderis qazan aıynda júzege asty. 1962 jyly týǵan áıeldiń donorlyǵynyń arqasynda alty pasıent aman qaldy. Onyń júregi, baýyry, eki búıregi, kózdiń qasań qabyqtary ártúrli jastaǵy naýqastarǵa salyndy.
Bul ıgi isti uıymdastyrýda aýrýhananyń stasıonarlyq transplantologııa úılestirýshisi Ǵalymjan Pirmaǵambetovtiń qajyr-qaıraty eren. Bilikti maman donordyń týystaryna túsindirý jumystaryn júrgizip, kelisim alý men barlyq medısınalyq qyzmettiń ózara baılanysyn rettep otyrady.
ALMATY
