Sharýashylyq basshysy Dmıtrıı Isaev – qalada týyp-ósken azamat. Qostanaıdaǵy №7 mektepte oqydy. 9-synyptan keıin Qostanaı avtomobıl kóligi kolledjinde bilim aldy.
Qalaǵa syımaıtyn, únemi aýylǵa elegizip, dala men dánniń, qora men maldyń ıisin ańsap turatyn adamdar bolady. Dımanyń boıynda da osyndaı qasıet bar. Ony bala jastan aýylǵa yntyqtyryp qoıǵan ata-ájesiniń meıirimi edi. Kanıkýl nemese merekelik demalys bola qalsa, jaz demeı, qys demeı, birden О́leńdige tartatyn. Munda atasynyń sharýa qojalyǵy bar. Temir-tersekke úıirsek, zerek bala 12 jasynan bastap osy sharýashylyqqa tıesili kez kelgen tehnıkanyń qozǵaltqyshyn jóndeı beretin. 13 jasynda-aq traktorǵa shalǵy tirkep, ózi shóp shaýyp, ony tasyp ákelip, taýdaı ǵyp qoranyń janyna úıip qoıatyn. Artylǵanyn elge satyp, kıim-keshegi men mektepke qajet zattaryn ózi túgendep alatyn.
Kolledjdegi oqýyn 2012 jyly támamdaǵan talapty jas bala osy jyly birjola О́leńdi aýylyna kelip, turalap qalǵan shaǵyn sharýashylyqty qolǵa aldy. Bul kezde atasynyń qýaty qaıtyp, qartaıyńqyrap, qojalyqqa tıesili alqap múlde qaraýsyz qalǵan edi. Onyń syrtynda, birtalaı jyldan beri salyǵy men ózge de tolyp jatqan mindettemelerin óteı almaǵan sharýashylyq shashetekten qaryzǵa batty. Osy aýyrtpalyqtyń bári tutastaı oqýdy jańa ǵana bitirip kelgen jas talaptyń moınyna artyldy.
Dmıtrıı aldymen topyraǵy tozyp, qumǵa aınalýǵa shaq turǵan alqaptyń qunaryn arttyrýdy qolǵa aldy. Jer erinbeı eńbek etkenge ǵana eselep beredi. Qasyna Rınat, Nurıslam, Mıhaıl syndy aýyldyń qolynan is keletin, eti tiri jigitterin jınaǵan sharýaqor azamat aınalasy bir-eki jyldyń ishinde jaqsy ónim alyp, qyrýar qaryzynan qutyldy. Odan keıingi jyldary sharýashylyq tehnıkasyn jańartýdyń qamyna kirisip, iske jararlyq traktor, kombaın satyp aldy. Tórt jyl qatarynan túsken tabysty shatqaıaqtap qalǵan sharýashylyqtyń eńsesin kóterýge jumsady. Burynǵy keńshardan qalǵan qamba men qoımany satyp aldy. Eginshilikti áýel basta 350 gektardan bastaǵan qojalyq on shaqty jyldyń ishinde alqap kólemin 2 myń gektarǵa jetkizip, arpa, bıdaı, jasymyq tárizdi dándi, maıly daqyldar ósirip otyr.
Kásipker 2017 jyly «Sybaǵa» baǵdarlamasy arqyly 25 bas iri qara alyp, mal sharýashylyǵynyń irgesin qalady. 2019 jyly memlekettiń qoldaýymen 80 bas aberdın angýs iri qarasyn, endi birer jyldan keıin áýlıekól sıyrlaryn satyp alyp, asyl tuqymdy mal sharýashylyǵy men eginshilikti qatar jolǵa qoıdy.
Búginde О́leńdide shamamen 50 shaqty úı tútin tútetip otyr. Shalǵaı eldi mekenniń toǵyz jyldyq mektebi, balabaqshasy bar. Kásipker shamasy jetkenshe aýyldyń áleýmettik jaǵdaıyna da qarasyp, mektep pen balabaqshaǵa materıaldyq kómek kórsetip turady. Qysta ózge sharýalarmen birlesip joldyń qaryn kúrep, áleýmettik nysandardyń aınalasyn tazartýǵa atsalysady. Aýyldaǵy 4-5 otbasy osy sharýashylyqtan nápaqa taýyp, jan baǵady.
Sharýa qojalyǵynda kóktemgi, kúzgi naýqan kezinde 12–14 adam jumys isteıdi. Jumysshynyń birazy qaladan keledi. О́ıtkeni qazir aýyldan jumysshy tabý qıyn. Aýylda otyrǵan ár otbasynyń óz maly, óz sharýasy bar. Al Dmıtrıımen birge jumys isteıtin bes adamnyń maly, onyń kútimi, otbasynyń otyn-sýy túgeldeı sharýashylyqtyń moınynda.
«Dıma bolmaǵanda aýyldan áldeqashan kóship keter me edim, kim bilsin. Ekeýmizdi eńbek tabystyrdy. Bala kezimizden-aq osy aýylda birge jumys istedik, mal baqtyq, shóp shaptyq. Keıin qalada oqýyn támamdap, osy sharýashylyqty qolyna alǵan soń, jumysqa shaqyrdy. Sodan beri birgemiz. Men úılenip, otaý kótergen jyly búkil jıhazymen daıyn úı berdi. Qazir bala-shaǵamyzben osy úıde turyp jatyrmyz. Malymyzdy sharýashylyqqa qosyp qoıdyq. Qysy-jazy osynda júredi. Jumystan keıin úıdegi malǵa jem-shóp berý kerek edi dep alańdamaımyz. Onyń syrtynda, malymyzǵa túrli aýrýǵa qarsy vaksınany da sharýashylyq ektiredi. Bul bizge de, sharýashylyqqa da qolaıly. Kádimgi shaǵyn ujymdyq sharýashylyq sııaqtymyz, árqaısymyzdyń óz úlesimiz, óz mindetimiz, óz jaýapkershiligimiz bar. Egin jaqsy shyqsa, tabysymyz eselenedi. Qýańshylyq jyldary barǵa qanaǵat, joqqa sabyr etemiz. О́ıtkeni egin nashar shyqqan jyldary sharýashylyq tabysynyń kóbi kóktemgi egis jumystaryna alǵan nesıeni jabýǵa ketedi. Buǵan túsinistikpen qaraımyz. Biraq qandaı qıyn jyldar bolsa da, Dıma eshkimdi aılyqsyz qaldyrmaıdy. Qalaǵa baryp qaryz alyp kelse de, eńbegimizdi beredi. Jaǵdaıyn kórip turǵan soń, keıde uıalyp, almaı qoıǵan kezimiz boldy. Bıyl jaqsy ónim aldyq. О́z basym bir aıdyń ishinde 2 mln teńge tabys taptym. Dmıtrıı – ýádege berik, degenine jetpeı qoımaıtyn tabandy azamat. Bar bolsa, bólisip otyrady. Mysaly, bıyl sharýashylyq esebinen balabaqshadaǵy balalarǵa jetkilikti etip túrli oıynshyq alyp berdi. Jylda mereke saıyn kómek berip turady», deıdi aýyl turǵyny Rınat Nurlybaev.
О́kinishke qaraı, atalǵan sharýashylyqtyń jumysshylary birtindep aýdan ortalyǵyna, qalaǵa qonys aýdaryp jatyr. Jurt kóbi turmystyń nasharlyǵynan emes, aýylda on bir jyldyq mekteptiń joqtyǵynan kóshýge májbúr. Bir-eki jyldan soń, Dmıtrıı basqaratyn sharýa qojalyǵynda eńbek etetin eki jumysshynyń da balalary toǵyzynshy synypty bitiredi.
Qostanaı oblysy
