Oǵan Parlament Senatynyń depýtattary Naýryzbaı Baıqadamov, Rýslan Rústemov, quqyq qorǵaý organdarynyń birinshi basshylary, aýdan ákimderi men arnaıy kelgen delegattar, zııaly qaýym ókilderi men el aǵalary qatysty.
Aımaq basshysy jyl almasar shaqtaǵy jańalyqtarǵa, qurylys, onyń ishinde turǵyn úı qurylysy salasyndaǵy jetistikterge toqtalyp, jańa páter ıelerin qonystoımen quttyqtady.
«2025 elimiz úshin de, óńirimiz úshin de birlik pen berekeniń, turaqtylyq pen tatýlyqtyń, jasampazdyq pen jarqyn isterdiń jemisti jyly boldy. Prezıdentimizdiń, Úkimettiń qoldaýymen óńirimizde serpindi jobalar júzege asyp, áleýmettik-ekonomıkalyq damý baǵytynda oń tendensııa qalyptasty. Aımaq negizgi makroekonomıkalyq kórsetkishter boıynsha respýblıkada alǵashqy oryndardan kórindi. Jalpy óńirlik ónim kólemi jyl qorytyndysymen 3 trln. 700 mlrd. teńgege jetip, 6,5 paıyzdyq ósim qamtamasyz etildi. Oblys bıýdjeti 851 mlrd. 300 mln. teńge bolyp, 2021 jyldan beri 246 paıyz ósti. Onyń 56 paıyzy áleýmettik salaǵa baǵyttaldy. Damý bıýdjetiniń kólemi bıyl 207 mlrd. teńgege jetip, 2021 jylmen salystyrǵanda 4,4 ese artty.
Memleket basshymyzdyń, Úkimettiń qoldaýymen Qyzylorda qarqyndy qurylys alańyna aınaldy. 2022 jyldan beri 200-ge jýyq áleýmettik nysan salynyp, el ıgiligine berildi.
Búgin – memleket qoldaýymen baspanaly bolǵan barshańyzǵa erekshe kún! Qonystaryńyz qutty bolsyn!», dedi N. Nálibaev.
Rásimde turǵyn úıdi sapaly salǵan qurylysshylar oblys ákiminiń Alǵys hatymen marapattalyp, Naýryzbaı Baıqadamov quttyqtaý lebizin jetkizdi. Qoǵam qaıratkeri Baqbergen Dosmanbetov bata berdi.
Eske salaıyq, 2022-2024 jyldary turǵyn úı kezeginde turǵan azamattarǵa 5 myńnan astam páter tabystaldy. Keıingi úsh jylda alǵash ret barlyq aýdanda 1800-ge jýyq jańa páter jerlesterimizdiń ıgiligine aınaldy. Bıyl 3600 páterlik turǵyn úı salýǵa bıýdjetten 58 mlrd. 785 mln. teńge bólindi.
Erekshe atap ótý qajet, ótken jyldan beri qalamyzda zamanaýı jańa dızaınmen jeti, toǵyz, on eki qabatty turǵyn úıler boı kóterýde.
