Roza Baǵlanova atyndaǵy «Qazaqkonsert» memlekettik akademııalyq konserttik uıymy sahnasynda uıymdastyrylǵan mazmuny baı, kórkemdik deńgeıi joǵary konsert kompozıtordyń san qyrly shyǵarmashylyǵyn qamtydy. Konsertte «О́mir jeli», «Gaýhar», «Jer-Aspan», «Altyn-arqa», «Anaǵa arnaý», «Darhan dala» syndy tyńdarman júreginen oryn alǵan týyndylar oryndalyp, operalardan úzindiler shyrqaldy. Sonymen qatar halyq ánderi men ulttyq bıler sahna kórkin asha tústi. Akademııalyq mýzyka men dástúrli ónerdiń úndestigi kórermenge erekshe áser syılap, rýhanı lázzatqa bóledi.
Mýzykalyq kesh memleket jáne mýzyka óneriniń kórnekti qaıratkeri, qoǵam qaıratkeri Jeksembek Erkimbekovtiń 95 jyldyq mereıtoıyna arnaldy. Bul – áke jolyn jalǵap, ulttyq ónerdiń damýyna súbeli úles qosyp júrgen Serik Erkimbekovtiń shyǵarmashylyǵyna kórsetilgen zor qurmettiń belgisi boldy.
Saltanatty keshte elimizdiń belgili óner maıtalmandary men shyǵarmashylyq ujymdary óner kórsetti. Atap aıtqanda, Qazaq memlekettik sımfonııalyq orkestri, «Gulder» men «Birlik» ansamblderi, «Baldáýren» balalar hory, Kúlásh Baıseıitova atyndaǵy Qazaq ulttyq óner ýnıversıteti hory men aspaptyq ansamblderi sahna sánin kirgizdi. Orkestr tizginin Qazaqstannyń eńbek sińirgen qaıratkerleri Baqytjan Musaqojaeva men Asqar Dúısenbaev, sondaı-aq jas dırıjer Ilıas Dúısen ustady.
Keshke Qazaqstannyń eńbek sińirgen ártisi Bekbolat Baısaǵatov, Qazaqstannyń eńbek sińirgen qaıratkerleri Nurlan Izmaılov, Klara Tólenbaeva, Bıbigúl Januzaq, Erlan Rysqalı, Talǵat Musabaev, Jupar Ǵabdýlına, Medet Shotabaev, Saltanat Ahmetova jáne halyqaralyq, respýblıkalyq baıqaýlardyń laýreattary qatysty. Árbir oryndaýshy kompozıtor shyǵarmalarynyń tereń mazmunyn, ulttyq bolmysyn aıshyqtaı bildi.
«О́mir jeli» keshi – uly dalanyń keńdigin, asqar taýlardyń bıiktigin, ózen-kólderdiń sulýlyǵyn, ýaqyt pen taǵdyr tynysyn áýen arqyly beınelegen taǵylymdy mádenı oqıǵa boldy. Bul konsert Serik Erkimbekovtiń shyǵarmashylyq jolyndaǵy mańyzdy beles qana emes, elorda mádenı ómirindegi jarqyn sátterdiń birine aınaldy.
