– Aqnur Nurtalapqyzy, «Jas ulan» uıymynyń basty mıssııasy men qoǵamdaǵy rólin ashyp aıtyp berseńiz.
– «Jas ulan» uıymynyń basty mıssııasy – ulttyq bolmysy berik, el taǵdyryna beıjaı qaramaıtyn, óz áleýetin el ıgiligine jumsaı alatyn urpaq tárbıeleý. Biz úshin bul tek tárbıe jumysy ǵana emes, bul – bolashaqqa salynǵan ınvestısııa. Búginde qatarda 3 mıllıonnan astam jasulandyq bar. Bul – elimizdiń ár óńirindegi balalardyń ortaq qundylyqtar tóńireginde birigip otyrǵanyn kórsetedi.
Prezıdent atap ótken «Ádiletti Qazaqstan» tujyrymdamasyndaǵy jastardyń belsendiligi men azamattyq jaýapkershiligin arttyrý ıdeıasy bizdiń jumysymyzben tolyq úndes. Biz balalardy kishkentaıynan óz eliniń azamaty retinde sezinýge baýlımyz. «Jas ulan» – balanyń ózin tabýyna, áleýetin ashýyna, armanyna senýine múmkindik beretin orta.
– Uıym «Balalar úshin emes, balalarmen birge» qaǵıdatyn basshylyqqa alady. Bul ustanym is júzinde qalaı júzege asady?
– Bul qaǵıdat – «Jas ulannyń» rýhanı ózegi. Biz balalardy tek baqylaýshy nemese tyńdaýshy emes, qoǵamnyń tolyqqandy múshesi retinde qabyldaımyz. Ár balanyń oıy, usynysy, bastamasy biz úshin mańyzdy. Sondyqtan uıym qyzmetinde balalardyń daýsy estilýge tıis.
Mysaly, keıingi jyldary júzege asqan «Fenomen Jas» jobasy táýelsizdik jyldarynda tabysqa jetken jas qazaqstandyqtardy nasıhattap, jasóspirimderge shabyt berdi. Al qarjylyq jáne sıfrlyq saýattylyqqa arnalǵan «Zerdeli» ústel oıyny – astanalyq balalardyń óz ıdeıasy. Mundaı jobalar arqyly balalar tek qatysýshy emes, bastamashy retinde qalyptasady. Bul – demokratııalyq mádenıettiń, erkin oılaýdyń naqty kórinisi.
Uıymnyń jeti baǵyty – táýelsiz eldiń negizgi qundylyqtaryn balanyń boıyna júıeli túrde sińirýdiń naqty tetigi. «Otan» baǵyty patrıottyq tárbıege baǵyttalsa, «Zerde» ıntellektýaldy damýǵa jol ashady. «Rýhanııat» ulttyq mádenıet pen rýhanı murany dáripteıdi, al «Ekoálem» tabıǵatqa jaýapkershilikpen qaraýdy úıretedi. «Jetijarǵy» baǵyty arqyly balalar quqyqtyq jáne azamattyq saýatyn arttyrady, «Salaýat» deni saý ómir saltyn nasıhattaıdy, al «Eńbek» baǵyty eriktilikke, kásipkerlikke jáne kásibı baǵdarǵa úndeıdi, negizdeıdi. Túpki maqsat – el bolashaǵyna jaýapkershilikpen qaraıtyn, sanaly azamat tárbıeleý.
– Balalar arasyndaǵy býllıng sekildi máselelerdi sheshý baǵytynda qandaı jumys júrgizilip jatyr?
– Biz úshin ár bala – mańyzdy tulǵa. Keıde mektepte óz ortasyn taba almaı, býllıngke ushyraǵan nemese ómirge senimi tómendegen balalar «Jas ulan» arqyly jańa tynys tabady. Uıym olar úshin qaýipsiz, ózara túsinistikke toly orta bola alady.
Kúni búginge deıin uıym qataryna qosylǵan ár bala eriktilikke aralasyp, dostar taýyp, óz qundylyǵyn qaıta sezine bastady. Bul – eń úlken jetistigimiz der edim. Sebebi jasóspirimniń sanasyna selkeý túsirmeı, boıyndaǵy jaryqty oıatý – kez kelgen marapattan bıik. Bizdiń kredo – meıirim men qamqorlyq. Al bul qundylyq eldiń qoǵamdyq júıesin nyǵaıtatyn tetik.
– Prezıdent Qasym-Jomart Toqaevtyń bastamasymen BUU Bas Assambleıasy 2026 jyldy Turaqty damý maqsattary aıasyndaǵy Halyqaralyq volonterler jyly dep jarııalaýyna baılanysty, volonterlik qyzmet pen halyqaralyq tájirıbe almasýda «Jas ulan» uıymy qandaı ról atqarady?
– Negizi volonterlik – jumysymyzdyń mańyzdy baǵyty. Astanalyq JasUlanTeam volonterler shtaby iri sporttyq jáne mádenı is-sharalarǵa turaqty túrde qatysady. Olar «Barys» hokkeı klýbynyń matchtarynda, halyqaralyq forýmdar men festıvalderde belsendilik tanytyp keledi. Sonymen qatar zeınet jasyndaǵy azamattarǵa arnalǵan mádenı is-sharalar uıymdastyryp, urpaqtar arasyndaǵy baılanysty nyǵaıtýǵa úles qosyp jatyrmyz.
Al halyqaralyq deńgeıde biz balalar men tálimgerlerdiń kókjıegin keńeıtýge mán beremiz. Jasulandyqtar Ortalyq Azııa, Túrkııa, Ázerbaıjan jáne TMD elderindegi forýmdar men bilim berý lagerlerine qatysyp, tájirıbe almasyp júr. Bul – tek bilim alý emes, elder arasyndaǵy dostyq pen mádenı baılanysty nyǵaıtýdyń da mańyzdy joly.
Búgingi jas ulan – erteńgi el tiregi. Biz Táýelsiz Qazaqstannyń erteńin senimdi qolda qaldyrý úshin eńbek etemiz. Balalardyń boıyndaǵy erik-jiger, izdenis pen shyǵarmashylyqty damyta otyryp, memlekettiń damýyna serpin beretin urpaq tárbıeleımiz. «Adal azamat» qaǵıdaty bizdiń basty qundylyǵymyz ben maqsatymyz. Ár jas ulandy adal oıly, ádil minezdi, meıirimdi de jaýapkershilikti tulǵa retinde qalyptastyrýǵa umtylamyz.
– Áńgimeńizge rahmet!
Áńgimelesken –
Zeıin ERǴALI,
«Egemen Qazaqstan»
