Kollajdy jasaǵan – Záýresh SMAǴUL ,«EQ»
Bul – bir eldiń ǵana emes, kúlli adamzat mádenıetiniń ortaq qazynasyna aınalǵan óner ıelerine kórsetilgen joǵary qurmet. Sebebi IýNESKO sheńberinde mereıtoılardyń atalyp ótýi – tulǵanyń eńbegi ulttyq deńgeıden asyp, jahandyq mańyzǵa ıe bolǵanyn bildiredi. Ermek Serkebaev pen Abdolla Qarsaqbaev dál osyndaı bıikke kóterilgen, qazaq rýhanııatynyń altyn qoryna ólsheýsiz úles qosqan qaıratkerler.
Ermek Bekmuhameduly Serkebaev – qazaqtyń kásibı vokal ónerin álemdik deńgeıge shyǵarǵan biregeı daýys ıesi. Ánshiniń barıton úni – tek tehnıkalyq sheberlik emes, ulttyń minezin, bolmysyn, ishki jan tebirenisin jetkizgen qudiretti daýys. Qazaq opera ónerindegi Abaı, Qojaǵul, Serke syndy beıneler ánshi oryndaýynda jańa kórkemdik bıikke kóterildi. Ol sahnada án aıtqan joq, halyqtyń taǵdyryn, tarıhyn, armanyn sóıletti. Sondyqtan da Ermek Serkebaevtyń óneri – ýaqytpen shektelmeıtin rýhanı mura.
Al Abdolla Qarsaqbaev – qazaq kınosynyń júregine aınalǵan esim. Onyń týyndylary qarapaıymdylyǵymen tereń, shynaıylyǵymen qymbat. Ásirese «Meniń atym Qoja» fılmi – birneshe býynnyń sanasyna sáýle túsirgen, adamgershilik pen adaldyqty dáriptegen máńgilik shyǵarma. Qarsaqbaev kıno arqyly qazaq balasynyń bolmysyn, aýyl ómiriniń fılosofııasyn, ulttyq tárbıeniń máıegin názik ıýmor men úlken júrek arqyly kórsete bildi. Rejısser kamerany tek tehnıka retinde emes, adam janyna úńiletin qural retinde qoldandy.
Al qos tulǵanyń shyǵarmashylyǵyn biriktiretin ortaq qasıet – shynaıylyq pen ulttyq rýhqa adaldyq. Olar óz zamanynda da, búgin de kórermen men tyńdarmanyn joǵaltqan joq. Sebebi naǵyz óner ýaqyttan bıik turady. Toqeterin túıgende, Ermek Serkebaevtyń úni men Abdolla Qarsaqbaevtyń kıno tili – qazaq halqynyń jan daýysy. Sol daýys búginde IýNESKO minberinen estilip, adamzat mádenıetiniń ortaq áýenine aınalýy – ultymyz úshin zor mártebe. Bul mereıtoılar ótkenge taǵzym ǵana emes, bolashaqqa senimmen qaraýdyń jarqyn nyshany.
