Foto: Akorda.kz
Byltyr álemdik deńgeıdegi keıbir aqparat quraldary Qazaqstandy saıahat jasaýǵa eń laıyq elderdiń qataryna qosty. Alaıda, elimizdegi kýrorttar men tanymal týrıstik oryndardyń jappaı qonaq kútýge daıyndyǵy kúmán týdyratyny jasyryn emes.
Prezıdenttiń aıtýynsha, kúmánnniń týyndaýy zańdylyq.
«Mundaı kúmánniń týyndaýy zańdy. Men Úkimetke eskertý jasaǵannan keıin týrızmdi damytý jumystary jandana tústi. Alaıda, aldymyzda uzaq ta kúrdeli jol tur. Bul – ekonomıka, mádenıet, qaýipsizdik jáne bıznes – barlyǵy bir jerge toǵysatyn kúrdeli sala. Munda óz jumysyna jan-tánimen berilgen kásibı mamandar, eń bastysy, naǵyz otanshyl azamattar jumys isteýi kerek. Týrızm salasynda jalqaýlyq pen nemquraılylyqqa, ashkózdik pen dórekilikke jol joq.
Byltyr Qazaqstanǵa mıllıondaǵan shetel azamaty keldi. Ishki týrızm qarqyndy damı bastady. Munyń bári – óte jaqsy úrdis», dedi Qasym-Jomart Toqaev.
Prezıdenttiń sózinshe, qazir ekotýorızmge suranys joǵary.
«Álem elderi týrısterdi tartý úshin jeke ınvestorlarǵa qolaıly jaǵdaı jasap otyr. Bizdiń elde kórikti jerler óte kóp. Qazir ekotýrızmge degen suranys joǵary. Osy turǵydan alǵanda, Qazaqstanǵa teń keletin el joq sekildi kórinedi. Alaıda, belgili bir sebepterge baılanysty, sonyń ishinde jaýapty tulǵalardyń biliksizdigi men nemquraılyǵynyń kesirinen týrızmniń bolashaǵy zor osy bir salasy áli kúnge deıin kenje qalyp otyr. Ázirge tanystyrý, ıaǵnı prezentasııa jumystarynan ári asa almaı jatyrmyz.
Týrızmniń damýyna tumsa tabıǵatty qorǵaý degen jeleýmen kez kelgen jobaǵa qarsy naýqan uıymdastyratyn keıbir «eko-belsendiler» zııan keltirip otyr. Kópshiliginiń tabıǵatta sharýasy da joq. Olar óziniń tanymaldyǵyn arttyrý úshin qoǵamdy dúrliktirýdi, qazirgi tilmen aıtqanda, «haıp» jasaýdy ǵana kózdeıdi. Týrızm bıznesinde ábden ákki bolǵan, básekelesterdiń shyqqanyn qalamaıtyn kásipkerler keıde olardyń qoltyǵyna sý búrkip otyrady», dedi Prezıdent.
Memleket basshysy týrıstik ınfraqurylymdy ártaraptandyrý máselesine nazar aýdarý qajet ekenin aıtty.
«Taý shańǵysy týrızmine qatysty jaǵdaı da osyǵan uqsas. «Shymbulaq» Almaty qalasynyń ortalyǵynan nebári jarty saǵattyq jerdegi erekshe tabıǵattyń ortasynda tur. Álemde oǵan teń keletin demalys orny kemde-kem. Alaıda, kópten beri eshteńe jasalmaǵan kýrorttyń syny da, syry da ketip, tozyp barady. Tabıǵattyń tamasha tartýy sanalatyn osy kórikti mekendi damytý úshin tyń tásilder qajet. Qazir elimizdegi tájirıbeli developerlik kompanııa iske kiristi. Biraq, Úkimet pen ákimdiktiń qoldaýyna qaramastan, jumys barysy daıyndyq jáne tanystyrý sharalarynan asa qoıǵan joq. Al, kórshi elderde taý shańǵysy ınfraqurylymy qarqyndy salynyp jatyr.
Almaty taý klasteriniń áleýeti óte zor. Bul salada aýqatty adamdarǵa da, ortasha tabysy bar azamattarǵa da birdeı qyzmet kórsetilýge tıis. Sondyqtan, ondaǵy týrıstik ınfraqurylymdy ártaraptandyrý máselesine nazar aýdarý qajet», dedi Prezıdent.
Qasym-Jomart Toqaevtyń aıtýynsha, sondyqtan, Túrkistanda Halyqaralyq týrızm jáne meımandostyq ýnıversıteti ashyldy.
«2024 jyly oqý ordasynyń alǵashqy túlekteri dıplomdaryn alyp, eńbek naryǵyna qosyldy. Alaıda, bul – jetkiliksiz. Kadr máselesin sheshý úshin qosymsha sharalar qabyldanady.
Degenmen, salymyz sýǵa ketip, eńsemizdi túsirip otyrýǵa da bolmaıdy. Álemdik deńgeıdegi tabloıdtar saıahatshylarǵa Qazaqstanda demalýdy usynyp jatsa, eki ese qarqynmen jumys isteýimiz kerek. «CNN Travel» 2025 jyly Almatyny Ortalyq Azııadaǵy «sáni men saltanaty jarasqan jańa astana» dep atady. Almaty ákimine shahardy kúndiz-túni qonaǵy úzilmeıtin Nıý-Iork, Máskeý, Parıj sııaqty «eshqashan kóz ilmeıtin qalaǵa» aınaldyrý tapsyryldy. Qalada ınfraqurylymdy jaqsartý, abattandyrý, jaryqtandyrý baǵytynda áli de kóp jumys istelýi kerek», dedi Prezıdent.
