Italııada ótetin qysqy Olımpıada oıyndary - 2026 jyldyń basty sporttyq dodasyna aınalmaq. Olımpıada aıasynda muzdaǵy jáne taýdaǵy sport túrleri bir alańda toǵysady. Al ashylý jáne jabylý saltanaty eldiń tarıhı ári sımvoldyq oryndarynda uıymdastyrylady.
Atalǵan dúbirli doda 6 aqpanda bastalady. Qazirgi tańda Qazaqstan quramasy olımpıadalyq lısenzııalar úshin kúresip jatyr. Búgingi kúnge deıin bizdiń sportshylar short-trek, mánerlep syrǵanaý jáne konkımen júgirý sport túrleri boıynsha Olımpıadaǵa qatysý quqyǵyna ıe boldy.
Jalpy alǵanda, Olımpıadada 116 olımpıadalyq jáne 79 paralımpıadalyq júlde jıyntyǵy sarapqa salynady. Jarystar qysqy sporttyń barlyq klassıkalyq túrleri boıynsha ótedi: taý shańǵysy, shańǵy jarysy, bıatlon, konkımen júgirý, short-trek, mánerlep syrǵanaý, hokkeı, snoýbord, frıstaıl, bobsleı, shańǵy qossaıysy, skeleton, shańǵymen tuǵyrdan sekirý, kerlıng, shana sporty.
Aıta keterligi, skı-alpınızm alǵash ret Olımpıada baǵdarlamasyna engizildi.
2026 jylǵy Azııa oıyndary
Jazǵy sport túrleri boıynsha jyldyń basty jarysy - Azııa oıyndary bolmaq. Atalǵan týrnır 2026 jyldyń 19 qyrkúıegi men 4 qazany aralyǵynda Japonııanyń Aıchı-Nagoıa qalasynda ótedi.
Azııa oıyndary − Olımpıadadan keıingi qurlyqtaǵy eń iri sporttyq doda. 2026 jyly jarys baǵdarlamasy edáýir keńeıtildi: 41 sport túri, 68 dıssıplına, 460 jarys túri qamtylady. Baǵdarlamaǵa akvabaık, brıdj, kıbersport, boýlıng sekildi jańa sport túrleri engizilip, alǵash ret Azııa oıyndarynda aralas jekpe-jekten saıys uıymdastyrylady.
Azıada-2026 strategııalyq mańyzǵa ıe, sebebi ol Olımpıadaǵa eki jyl qalǵanda jáne irikteý kezeńiniń qarsańynda ótedi.
2026 jylǵy jasóspirimder Olımpıadasy
Jyl sońynda Senegal astanasy Dakar IV jazǵy jasóspirimder arasyndaǵy Olımpıada oıyndaryn qabyldaıdy. Doda 31 qazan men 13 qarasha aralyǵynda ótedi.
Aıta keteıik, jasóspirimder Olımpıadasy Afrıka qurlyǵynda alǵash ret uıymdastyrylady. Oıyndarǵa qatysatyn sportshylardyń jasy jabylý saltanaty kezinde 17-den aspaýy tıis. Al eń tómengi jas sanatyn ár sport túri boıynsha halyqaralyq federasııalar bekitedi.
Jarys baǵdarlamasyna 25 sport túri engizildi. Al taǵy 10 sport túri kórsetilimdik formatta ótedi. Bul sheshim qabyldaýshy el men aımaqtaǵy jastardyń sportqa qyzyǵýshylyǵyn arttyrýǵa baǵyttalǵan.
Aldyńǵy jasóspirimder Olımpıadasynan aıyrmashylyǵy − Dakar-2026-da dástúrli irikteý júıesi bolmaıdy. Kvotalardy Halyqaralyq Olımpıadalyq komıteti men halyqaralyq federasııalar ortalyqtandyrylǵan tártippen bóledi.
Jabyq keshendegi jáne jekpe-jek sport túrleri boıynsha 2026 jylǵy Azııa oıyndary
2026 jyly Er-Rııad (Saýd Arabııasy) taǵy bir iri keshendi jarystyń ortalyǵyna aınalady. Munda jabyq keshendegi jáne jekpe-jek sport túrleri boıynsha Azııa oıyndary (AIMAG) ótedi.
Bul jarys bastapqyda 2024 jyly Bangkok pen Chonbýrıde (Taıland) ótýi tıis bolǵan. Alaıda birneshe ret keıinge shegerilgen soń Azııa Olımpıadalyq keńesi ony toqtatqan edi.
AIMAG aıasynda jabyq sport nysandarynda ótkizýge qolaıly qoıan-qoltyq urysqa negizdelgen sport túrleri men jekelegen dıssıplınalar qamtylady.
Jarysqa Azııa qurlyǵynyń 45 Ulttyq Olımpıadalyq komıtetiniń ókilderi qatysady.
Baǵdarlamada Azııa elderi dástúrli túrde myqty sanalatyn sport túrleri bar: kúres, taekvondo, karate, mýaı-taı, kıkboksıng, dzıýdo, jeńil jáne aýyr atletıka, júzý, trektegi velosport jáne basqa da dıssıplınalar.
Oıyndar 28 qarasha men 7 jeltoqsan aralyǵynda ótip, Azıada-2034 aldyndaǵy mańyzdy synaq retinde qarastyrylady. Aıta keteıik, bul Azıadany da Er-Rııad qabyldaıdy.
2026 jylǵy jaǵajaıdaǵy Azııa oıyndary
On jyldyq úzilisten keıin jaǵajaıdaǵy Azııa oıyndary sport kúntizbesine qaıta oralady. Sońǵy ret bul jarys 2016 jyly ótken bolatyn.
2026 jylǵy jaǵajaı Azıadasy 22-30 sáýir aralyǵynda Qytaıdyń Haınan aralyndaǵy Sanıa qalasynda ótedi. Munda sý sport túrleri, jazǵy sporttyń jaǵajaıdaǵy nusqalary, sporttyq quzǵa órmeleý, jeńil atletıkanyń jekelegen dıssıplınalary, jelkendi sport jáne jekpe-jek túrleri qamtylady.
2026 jylǵy álem chempıonattary
Sonymen qatar Qazaqstan sportshylaryn kóptegen álem birinshiligi kútip tur.
- Konkımen júgirýden álem chempıonaty (klassıkalyq jáne sprınttik kópsaıys) - Herenven, Nıderland (5-8 naýryz)
- Jeńil atletıkadan jabyq keshendegi álem chempıonaty - Torýn, Polsha (20-22 naýryz)
- Mánerlep syrǵanaýdan álem chempıonaty - Praga, Chehııa (23-29 naýryz)
- Ústel tennısinen komandalyq álem chempıonaty - London, Ulybrıtanııa (28 sáýir - 10 mamyr)
- Semserlesýden álem chempıonaty - Gonkong (21-30 shilde)
- Kórkem gımnastıkadan álem chempıonaty - Frankfýrt, Germanııa (12-16 tamyz)
- Kúres túrlerinen álem chempıonaty - Manama, Bahreın (5-13 qyrkúıek)
- Tasjoldaǵy velosporttan álem chempıonaty - Monreal, Kanada (20-27 qyrkúıek)
- Trıatlonnan álem chempıonaty - Pontevedra, Ispanııa (23-27 qyrkúıek)
- Sadaq atýdan álem chempıonaty - Iаnkton, AQSh (24 qyrkúıek - 4 qazan)
- Dzıýdodan álem chempıonaty — Baký, Ázerbaıjan (4-11 qazan)
- Trektegi velosporttan álem chempıonaty - Shanhaı, Qytaı (14-18 qazan)
- Sporttyq gımnastıkadan álem chempıonaty - Rotterdam, Nıderland (17-28 qazan)
- Aýyr atletıkadan álem chempıonaty - Nınbo, Qytaı (27 qazan - 8 qarasha)
- Nysana kózdeýden álem chempıonaty - Doha, Qatar (1-15 qarasha)
- Qysqa sýda júzýden álem chempıonaty - Beıjiń, Qytaı (1-6 jeltoqsan)
Maýsym barysynda sporttyq kúntizbede ózgerister bolyp, jarys sany artýy múmkin.
