Almaty qalasy Mádenıet basqarmasynyń deregine súıensek, biliktilikti arttyrý baǵdarlamasy Seýl qalasy mýzeıleri birlestigi tarapynan iske asty. Onda mádenıet pen mýzeı isi salasyndaǵy halyqaralyq yntymaqtastyqty nyǵaıtý máselesi qarastyryldy. Oqý baǵdarlamasy sheńberinde zamanaýı mýzeı qyzmetiniń negizgi baǵyttary, atap aıtqanda, eksponattardy esepke alý jáne saqtalýyn qamtamasyz etý, onyń ishinde qolaıly klımattyq jaǵdaıdy baqylap, retteý, restavrasııa jáne konservasııa jumystaryn júrgizý, tasymaldaý kezinde qaýipsizdik talabynyń saqtalýyn qadaǵalaý boıynsha teorııalyq jáne tájirıbelik sabaqtar ótti.
Almaty qalasy mýzeıler birlestigi men Seýl qalasy tarıhy mýzeıi arasynda yntymaqtastyq týraly memorandým 2022 jyly jasalǵan edi. Kelisim aıasynda Seýl qalasy tarıhy mýzeıinde Almaty mýzeıiniń «Uly dala jaýharlary» kórmesi, al Seýl tarıhy mýzeıiniń «Seýl ǵajaıyptary» kórmesi Almaty qalasynda uıymdastyrylǵan bolatyn.
Osy kelisimge oraı taǵylymdamada mýzeı qyzmetkerleri Seýl jáne Kendjý qalalarynyń jetekshi mýzeıleriniń jumys tájirıbesimen jan-jaqty tanysty. Atap aıtqanda, bul tizimde Koreıanyń ulttyq mýzeıi, Koreıa ulttyq folklor mýzeıi, Seýl qalasy tarıhy mýzeıi, Seýl qolóner mýzeıi, Sedjon patsha mýzeıi, Admıral Lı Sýnsın mýzeıi, Koreıanyń ulttyq saraı mýzeıi, Kendjý ulttyq mýzeıi, Kendjý ulttyq parki, Kenbokkýn saraıy, Chhongechhon mýzeıi, Hanıandoson bekinis-qamaly mýzeıi bar. Sonymen qatar IýNESKO-nyń Álemdik muralar tizimine engen ashyq aspan astyndaǵy Kendjý arheologııalyq kesheniniń qyzmeti, ozyq tájirıbesi zerdelendi.
ALMATY
