Qaıǵyly oqıǵa Shubarsý aýylynda bolǵan. Onda 38 jastaǵy balabaqsha tárbıeshisi úsh ulymen birge jaldamaly shaǵyn úıde turǵan. Áıel joldasymen ajyrasqan eken.
Kórshilerdiń aıtýynsha, qaıǵyly jaǵdaıdyń aldynda áıel murjany tazalaýdy josparlaǵan, alaıda oǵan úlgermegen. Tańerteń jumysqa kelmegenin baıqaǵan áriptesteri dabyl qaqqan.
«Áriptesteri kelgen kezde esik jabyq bolǵan, al ishten telefonnyń daýysy men yńyrsyǵan ún estilgen. Olar esikti buzyp kirgende, úsh adam jan tapsyrǵan eken. Úlken uly ǵana tiri qalyp, ony jedel járdemmen aýrýhanaǵa alyp ketti», deıdi marqumnyń týysy Jambyl Daýletov.
Áıelmen birge 5 jáne 7 jastaǵy eki balanyń máıiti tabylǵan. Úsheýi de jer qoınyna tapsyryldy. Tek úlken uly – 13 jastaǵy bala ǵana tiri qaldy. Qazirgi tańda onyń ómirine qaýip tónip turǵan joq.
«Buǵan deıin mamandar bul úıge baryp, úı ıesine órt qaýipsizdigine baılanysty túsindirý jumystaryn júrgizgen. Alaıda osyndaı jaǵdaı oryn aldy. Aldaǵy ýaqytta mundaı qaıǵyly oqıǵalardyń aldyn alý úshin búkil aýyldyq okrýg boıynsha áleýetti qaýipti úılerdi anyqtaý jumysyn kúsheıtýdi josparlap otyrmyz», dedi Shubarsý aýyldyq okrýgi ákiminiń orynbasary Ǵabıt Aman.
Aıta keteıik, buǵan deıin Atyraý mańyndaǵy Tomarly aýylyndaǵy jeke turǵyn úıde úsh adam kómirqyshqyl gazynan ýlanyp kóz jumǵan edi.
