Qazir elimizde júrip jatqan saıası reformanyń negizgi maqsaty – qoǵamdy ıgilikke, ádilettikke, adamgershilikke, eńbekqorlyqqa, jaýapkershilikke, meıirbandylyqqa, úılesimdilikke qaraı tabıǵı, sapaly ózgertý. Bul – óz qolymyzdan keletin, kúshimiz jetetin is. Barlyq salany (ekonomıka, óndiris, aýyl sharýashylyǵy, saıasat, quqyq, mádenıet, áleýmettik ınstıtýttar) tereń, sapaly, irgeli, jan-jaqty reformalaý – memleket, jaýapty oryndar mańdaı teriniń ólshemi. Ońaı emes, biraq qaıtarymy men qaıyry mol jumys. Ozyqtarmen teńelý, eldik tegeýrin osy jolda.
Tarıhı jolaıyryq – 2019 jyly jumysyn bastaǵan Ulttyq qoǵamdyq senim keńesi de, Qańtardyń qatań sabaǵynan soń 2022 jyly iske kirisken Ulttyq quryltaı da el Prezıdenti janynan quryldy. Qoǵamdyq senim keńesi Ulttyq quryltaı deńgeıine ósti desek, aqylǵa syıymdy. Qoǵam sengen zııaly tulǵalar, saıası partııalar, úkimettik emes uıym kóshbasshylary, azamattyq sektordyń sarabdal ókilderi engen bul eldik qurylymnyń qýaty – halyqqa jaqyndyǵynda, ózekti máseleniń máni men sheshilý jolyn júıeli baıyptaýynda, eń bastysy, bılik pen qoǵam arasynda altyn kópir bola bilýinde.
Árıne, álem men aınala toly qaıshylyq. Biraq Qazaqstan qoǵamynyń qundylyǵy, qurylymy, pishini, qordalanǵan zárýligi kóbimizge málim. Sondyqtan Ulttyq quryltaı men basqa da qoǵamdyq uıymdar qajetti ózgeristiń tetigin, máseleni sheshýdiń amalyn qarastyrýǵa áleýeti jetedi.
Shejireli Ulytaýda, tuǵyrly Túrkistanda, Ulyq ulys jurty Atyraýda, han-sultan qonysy Býrabaıda ótken Ulttyq quryltaı jıynynyń árbiri tarıh ólshemimen qarasaq ta, búgingi jańarǵan ult paıymymen saralasaq ta eleýli nátıjege qol jetkizdi.
Prezıdent Q.K.Toqaev Ulytaýdaǵy Quryltaıda jalpyulttyq birlikti nyǵaıtý, saıası reformalardyń mán-mańyzy, jańa tehnologııanyń múmkindikteri týraly aıta kelip, jańashyldyq pen ádilettiktiń, eldi uıystyratyn tarıhı jad pen zamanaýı izdenisterdiń jón-jobasyna toqtaldy. Quryltaı seksııalarynda da osy baǵdarda ózekti máseleler talqylandy. Jıynnan soń jumys komıssııalary qoǵammen baılanysty jandandyryp, qanshama ıgi ister atqardy. Túrkistandaǵy Quryltaıda Memleket basshysy Ádiletti Qazaqstan men adal azamat uǵymyn, qundylyǵyn taldap-tarazylady. Eldik nyshandardy jetildirý, tarıhı sana-sezimdi jańǵyrtý, mádenı muramyzdy dáripteý, urpaq tárbıesi, tıimdi aqparat saıasaty men kreatıvti ındýstrııa, saıası taldaý men saraptamany sapalandyrý, strategııalyq aýmaqtardy damytý, memlekettik qyzmet jaýapkershiligi jan-jaqty baıyptaldy. Basqosýda keleli oılar ortaǵa salyndy. Quryltaı músheleri men atqarýshy bıliktiń Túrkistanǵa rýhanı zııaraty qasıetti mekende elshildik pen eldik dástúr aldynda bergen serti dep qabyldandy.
Kóne Saraıshyq jurtynda (Atyraý) shaqyrylǵan Quryltaıda Qasym-Jomart Kemeluly adaldyq qundylyǵyn jaýapty adammen, eńbekpen, tabyspen baılanysta sóz etti. Rýhanııat, til, kitap oqý, akademııalyq tarıh kóptomdyǵy, dástúrli din men dil, qaharmandar ónegesi, qoǵam keselderi (lýdomanııa, qumarpazdyq, veıp, vandalızm, býllıng t.b.), ekonomıkalyq izdenis pen serpilis, kommýnaldyq-ınjenerlik júıeni ońdaý, saýatty logıstıka t.b. jańarýdyń ózekti mindetin túsindirdi. Seksııalarda qordalanǵan oı-usynystar qorjyny ret-retimen talqylandy.
Memleket basshysy Býrabaıdaǵy Quryltaıda jańa turpatty ózgeristerdiń bastapqy nátıjeleri, ádiletti salyq reformasynyń máni, áleýmettik jeli mádenıeti, zamanaýı óner qýaty, eńbek naryǵyndaǵy báseke, esirtkige qarsy sharalar, turmystyq zombylyqqa qarsy zań, «Birtutas tárbıe» baǵdarlamasyn «Adal azamat» qaǵıdaty men ataýyna sáıkestendirý, «Qazaqstan balalary» birtutas baǵdarlamasy, Onomastıka men marapattaǵy birizdilik pen saýattylyq, Ishki saıasat tujyrymdamasynyń zárýligi, Abaıdyń 180 jyldyǵy men dana hakim ınstıtýtynyń ózektiligi, «Álem jady» qorynyń qazaq mazmuny, ult tarıhy men jahan órkenıetin úılestirý, serpindi ekonomıkalyq, ındýstrııalyq, ınvestısııalyq, logıstıkalyq jobalar, el óńirlerin teń damytý, IT bastamalar men jobalardyń jańa kezeńi sekildi maqsat-mindetterdi aıqyndady. Quryltaı músheleri úkimet pen zań shyǵarýshy qurylymnyń jaýapty tulǵalarymen birlese otyryp, mańyzdy máselerdi sheshýdiń jolyn qarastyrdy.
Qazaq eliniń tarıhı tórt tarapy arasy myńdaǵan shaqyrym jer bolsa da, el birligi men shejiresi, ortaq murat pen múdde olardy jaqyndastyryp, jalǵastyryp tur. Prezıdentimiz Ulytaýda: «Babalarymyz mańyzdy máselelerdi osyndaı alqaly jıynda talqylaǵan. Halyq aqyldasa otyryp, bir toqtamǵa kelgen» dep ótkenniń taǵylymyn eske alsa, byltyr Býrabaıda: «Bizdiń ıdeologııamyz qarapaıym ári túsinikti. Bul – jahandaǵy asa kúrdeli geosaıası ahýalda elimizdi jańa damý deńgeıine kóterý úshin berik negiz qalaý degen sóz» dep, búgingi ulttyq mıssııanyń baǵdaryn anyqtap berdi.
Endigi Quryltaı jıyny – ejelden el berekesine uıytqy, san ordanyń joqshysy Qyzylordada. Orta tolsyn, oı qazynasy óremizdi bıiktetsin.
