Ujym usynǵan málimetterge súıensek, aldaǵy maýsymda teatr repertýary klassıkalyq mura men qazirgi horeografııa arasyndaǵy shyǵarmashylyq dıalogqa negizdeledi. Bul baǵyttaǵy nazar aýdararlyq premeralardyń biri – Morıs Raveldiń mýzykasyna qoıylǵan zamanaýı bir aktili «Bolero X» baleti. HH ǵasyrdyń mýzykalyq jaýhary sanalatyn Boléro orkestrlik varıasııalary negizinde jasalǵan qoıylym bıdiń tabıǵatyn, onyń ýaqyt pen keńistiktegi evolıýsııasyn fılosofııalyq turǵyda zerdeleıdi. Yrǵaq pen plastıka, mýzyka men qımyl birtutas kórkem álemge aınalyp, kórermendi zamanaýı horeografııanyń jańa qyrlarymen tanystyrady.
Sonymen qatar 2026 jylǵy repertýarda teatrdyń bas baletmeısteri Mukaram Avahrıdiń qoıylymyndaǵy «Qyz Jibek» baleti aıryqsha oryn alady. Qazaqtyń máńgilik mahabbat dastanyn arqaý etken spektakl dástúrli beınelerdi zamanaýı sahnalyq sheshimdermen úılestire otyryp, ulttyq klassıkanyń mazmunyn tereń ashady. Bul qoıylym arqyly teatr mádenı muraǵa degen qurmetti, ony búgingi kórermenge jańasha usyný múmkindigin aıqyn kórsetedi.
Maýsymnyń eń iri oqıǵalarynyń biri – álemdik balet óneriniń injý-marjany sanalatyn «Baıaderka» baletiniń aýqymdy premerasy bolmaq. Aıtýly týyndyny sahnalaý arqyly «Astana Balet» teatry akademııalyq dástúrge adaldyǵyn dáleldep, otandyq kórermenge álemdik balet repertýarynyń úzdik úlgilerin joǵary kásibı deńgeıde usynýǵa daıyn ekenin aıqyndaıdy.
Shyǵarmashylyq ujym, sondaı-aq osy jyly teatrdyń repertýary klassıkalyq balettermen qatar zamanaýı horeografııalyq jobalarǵa, ulttyq baǵdarlamalar men konserttik qoıylymdarǵa da toly bolady dep ýáde etip otyr. Sımfonııalyq orkestr qatysatyn spektaklder men konsertter, hor, úzdik solıster, shaqyrylǵan dırıjerler óner kórsetetin jobalar teatrdyń mýzykalyq baǵytyn tereńdete túsedi. Orkestr jeke kórkem ujym retinde damyp, konserttik qyzmetin de júıeli túrde jalǵastyrady.
Buǵan qosa bıyl «Astana Balet» teatry gastroldik saparlarǵa shyǵyp, elimizdiń túkpir-túkpirin aralaýdy ári sheteldik sahnalarda óner kórsetýdi josparlap otyr. Bul saparlar ártister úshin jańa mádenı tájirıbe jınaqtap qana qoımaı, teatrdyń halyqaralyq deńgeıdegi bedelin arttyrýǵa yqpal etedi. Sonymen qatar bilim berý jáne áleýmettik jobalarǵa erekshe mán berilip, Qazaq ulttyq horeografııa akademııasymen yntymaqtastyqty keńeıtý, jas horeograftar men ártisterdi qoldaý, halyqaralyq shyǵarmashylyq bastamalardy iske asyrý basty nazarda bolady.
Osylaısha, 2026 jyl «Astana Balet» teatry úshin kórkem izdenis pen shyǵarmashylyq serpilis kezeńine aınalmaq. Jańa premeralar, ulttyq jáne álemdik klassıkanyń úılesimi, gastroldik saparlar men bilim berý jobalary teatrdyń mádenı keńistiktegi mańyzyn arttyryp, kórermenge balet óneriniń tereń de san qyrly álemin áıgileıdi.
