Foto: Qyzylorda oblysy ákimdigi
«Mysaly 14 jylda alǵash ret asa qundy «Handar shejiresi» qoljazbasyn IýNESKO-nyń «Álem jady» derekti muralar tizimine engizdik. Bıyl jazda Koreıa Respýblıkasynyń Pýsan qalasynda Búkilálemdik muralar komıtetiniń kezekti otyrysy ótedi. Sol kezde «Mańǵystaýdyń jerasty meshitterin» uıym tizimine qosý máselesi qaralady.
Qazir Qazaqstan materıaldyq emes mádenı muralar tizimine óz nysandaryn belsendi túrde engizip jatqan 25 eldiń qataryna kiredi. Biraq munymen toqtap qalýǵa bolmaıdy. Tól tarıhymyzdy zerdeleý, ónerimiz ben mádenıetimizdi órkendetý úshin áli kóp jumys istelýge tıis. Bul sharalar aldaǵy ýaqytta da jalǵasa beredi», dedi Prezıdent.
Sondaı-aq Memleket basshysy ǵalymdardyń Qyzylorda jerindegi Saýysqandyq pen Túrkistan oblysyndaǵy Arpa ózeninen jalpy sany 17 myń petroglıf tapqanyn, osyndaı qundy jádigerlerimiz ben ulttyq dástúrlerimizdi IýNESKO-nyń búkilálemdik muralar tizimine qosýdy tapsyrdy.
«Elimizde tanymdyq ári taǵylymdyq máni zor tarıhı oryndar men qundy jádigerler az emes.
Mysaly taza aǵashtan salynǵan Jarkent meshiti – qytaı sáýletshileri men uıǵyr sheberleriniń qolynan shyqqan biregeı týyndy. Almatydaǵy «Voznesensk kafedraldy shirkeýi» de – aıryqsha tarıhı nysan.
Tatýlyq pen dostyqtyń sımvoly sanalatyn osy eki ǵımaratty «Birligimiz – áralýandyqta» qaǵıdatynyń is júzindegi kórinisi deýge bolady. Uly dalanyń árbir taý-tasy halqymyzdyń san ǵasyrlyq jylnamasynan syr shertedi. Sonyń biri – qoınaýy qazynaǵa toly Qarataý petroglıfteri.
Tórt myń jyldyq tarıhy bar tańbaly tastar tól órkenıetimizdiń tamyry tym tereńde jatqanyn kórsetedi. Ǵalymdarymyz Qyzylorda jerindegi Saýysqandyq pen Túrkistan oblysyndaǵy Arpa ózennen jalpy sany 17 myń petroglıf tapqan. Osyndaı qundy jádigerlerimiz ben ulttyq dástúrlerimiz IýNESKO-nyń búkilálemdik muralar tiziminde bolýǵa ábden laıyq dep sanaımyn. Quzyrly mınıstrlikke osy máselelerge qatysty jumysty qolǵa alýdy tapsyramyn», dedi Qasym-Jomart Toqaev.
Aıta keteıik, Qyzylordada Memleket basshysy Qasym-Jomart Toqaevtyń tóraǵalyǵymen Ulttyq quryltaıdyń V otyrysy ótti.
Prezıdent Quryltaıda sóılegen sózinde Aral teńizi máselesine toqtalyp, onyń jahandyq mańyzyn atap ótti.
Al Memlekettik keńesshi Erlan Qarın Býrabaıdaǵy quryltaıdan keıin 6 zań qabyldanyp, 10 zań jumysqa alynǵanyn jetkizdi.
