О́tkende bir eski túsirilimnen taldyrmash qana qyzdyń lepesin tyńdap qaıran qaldyq. «Kelesi tyńdaıtyn ánniń sózin Shómishbaı Sarıev aǵamyz, ánin Keńes Dúısekeev aǵamyz Sembek ekeýmizge arnap jazǵan. Bul ánniń keremeti sondaı, halyq Sembek ekeýmizdi «qosyp» qoıýǵa deıin bardy. Biraq Sembektiń júrip júrgen qyzy, meniń óz jigitim bar» desin. Sóıtsem, Maqpal Júnisovanyń jas kezi, Sembek Jumaǵalıevtiń jigit shaǵy eken. Sizder men aıtpaı-aq bilip otyrǵan shyǵarsyzdar, jarty ǵasyrǵa jýyq júrekterge gúl egip kele jatqan úzdik týyndy – «Ǵashyqtar jyrynyń» qazaq estradasynda ózindik orny bar. 1983 jyldardyń ústi Sembek aǵanyń janyp turǵan jigit shaǵy bolsa, Maqpal apaıdyń qylshyldaǵan qyz ǵumyry. Sol kezdiń ózinde klıp túsirilgen týyndy týraly jekelegen habar da bar. Al Altyn qordaǵy konsertterde ataqty dýet saqtalyp baqqanyna kúmán joq. Sondyqtan arasynda bolmasa, ánniń tarıhyna emes, júrekterge jortýylyna qulaq tikkimiz keledi.
Toqsanynshy jyldardyń belortasynda aýyldaǵy úılený toılary palatkalarda ótetin edi ǵoı. Jalbyraǵan qara palatkanyń ishi kirse shyqqysyz. Jupar ańqıdy. Taýdyń kók arshasynyń butalaryn julyp-julyp ákep aınaldyra qabyrǵasy men tóbesine tutyp, tómenge kók maısa shóp tósep tastaǵan soń ne kerek. Jazdyń jaıly kúnderinde ótetin ondaı toılar arman endi. Al anaý otalǵan arshanyń obalyn kim oılapty? Jaraıdy, ol basqa áńgime.
Aýyl bolǵan soń aǵaıynnyń toıy ánsiz óte me? Bir kezde etek jaqtan bir jigit kóteriledi. Dál Sembek aǵadaı shashyn ósirip, artyna qaıyryp alǵan. Qoıǵan murtyna sheıin kelińkireıtin. Tólegenniń murty ma, Sembek aǵanyń murty ma, aıyrýdyń ózi qıyn. Sol kisideı júrisi de salmaqty, ázdektemeı, ańdap basa kele «qasyń qandaı, qaraqat kóziń qandaı» dep syzylta bergende, kelisip alǵandaı tusynan bir boıjetken de tabyla keter edi. Aýyldyń toılarynda kúlki de, ázil de, bı de, kúı de bolatyn, bir ǵajaby – osyndaı salmaqty da syrly ánder arqasynda joǵary deńgeıde ótetindeı kóriner edi.
Ol kezde dýet sırek, qazir de kóp emes qoı. Al myna dýettiń jóni bólek-ti. Zamanynyń mańdaıaldysy deýge turarlyq. Sol tusta jup qurmaqshy qyz-jigitterdiń júrek qaǵysyn dóp basqan týyndyny halyq áli kúnge tyńdaıdy. Jaı tyńdamaıdy, yqylaspen tyńdaıdy. Qazir YouTube arnasyn ashyp, «Ǵashyqtar jyry» dep terip kórińiz. Buryn «Tamashada» jurt qalaı tyńdasa, búginde solaı tyńdaıtynyna kýá bolasyz. Jáne o bastaǵy oryndaýshylary sol shyrqaǵannan qazir de jyrlap kele jatqanynyń ózi bir ǵalamat. Keıbir ónertanýshylar «Ǵashyqtar jyryn» qazaq estradasyndaǵy alǵashqy dýetterdiń biri dep tanıdy eken.
Án áýenin ádiptegen áıgili sazger Keńes Dúısekeev shyǵarmasyn dúnıege ákelgen soń kózi birden Sembek aǵaǵa tússe kerek. Joǵaryda án áskeriniń jortýyly týraly sóılegenimizde týyndynyń da jaratýshysy hám qolbasshysy bar dep áspettegen edik qoı. Solar Shómishbaı Sarıev pen Keńes Dúısekeev bolsa, bastap alyp shyqqan Sembek Jumaǵalıev men Maqpal Júnisovanyń óneri. 1983 jyldary Sembek Jumaǵalıevti «Gúlder» ansamblinen kórgen Keńes Dúısekeev: «Meniń ánderimdi nege aıtpaısyń?» depti. Sonda ol: «Bireýler oryndap júrgen ánderińdi qaıtalaıtyn totyqus emespin ǵoı, maǵan arnap án jaz, oryndaıyn» dedim. Keńestiń qyz ben jigittiń dýetine arnalǵan «Ǵashyqtar jyry» degen jańa áni bar eken, Naǵıma Esqalıevaǵa arnapty. Ánniń áýenine, sózine qaraǵanda, Naǵımanyń tabıǵatyna kelińkiremeıdi. Sosyn men ol ándi ansamblge jańadan kelgen jas ánshi Maqpal Júnisovamen oryndap kóreıin dep sheshtim. Osy ándi 1983 jyldyń aıaǵynda bolǵan «Tamashada» oryndadyq. О́zime unady, óner adamynyń ózine-ózi unaýy qıyn ǵoı. Sodan beri halyq osy ándi tyńdaýdan jalyqqan emes. Maqpaldyń da baǵyn ashqan án boldy. «Qazaqtyń 100 ániniń» qataryna endi» deıdi ánshi.
Sózi men sazy jymdasyp bir qudiret týdyrmasa, án osy ýaqytqa deıin ómirsheń bolýshy ma edi? Odan keıin bul týyndyny qanshama jas shyrqap, júrekterinde áldıledi. Júrekterge jol tapty, sezimderin baıytty. Demek shyǵarma mahabbattyń boıtumaryna aınaldy.
«Kóńilge jyr tunady sen degende,
Júrekke syr tunady sen degende.
Keýdeme bir ǵajaıyp shattyq ornap,
О́mir de qulpyrady sen degende»
Bul kimniń bolsyn júrek túkpirine ornap qalatyn sóz. Laıym solaı bolsyn.
