Kúni keshe senatorlar Premer-mınıstrge joldaǵan depýtattyq saýalynda osyndaı derekter keltirdi. Jaıylym tapshylyǵy oblys aýmaǵynda ózekti problema bolyp tur. Mysaly, byltyr Saıram aýdany Shapyrashty aýylynyń turǵyndary mal jaıatyn jerdiń barlyǵy jekeniń menshigine ótip ketkenin, jaıylym tapshylyǵynan jurt jyl on eki aı tórt túligin qoraǵa qamap ustaýǵa májbúr ekenin aıtyp shaǵymdanǵan bolatyn. Al aýdandyq ákimdik Shapyrashty men Bereke aýylynda jaıylym jer joq ekenin ashyp aıtty. Degenmen óńirde bul baǵytta birqatar jumys atqarylyp jatyr.
Oblys ákimdiginiń málimetinshe, arnaıy qurylǵan jumys toby 2 271 jer paıdalanýshyǵa tıesili 335,8 myń gektar jaıylym jerde mal basynyń tirkelmegenin anyqtaǵan. Osyǵan baılanysty aýdan, qala ákimdikterimen birlesip naqtylaý jumystary júrgizilip, 187,3 myń gektar jaıylym jerdi memleket menshigine qaıtarý jospary bekitildi. Jalpy 2024-2025 jyldar aralyǵynda oblys boıynsha 293,3 myń gektar jaıylym jer memleket menshigine qaıtaryldy. Qaıtarylǵan jaıylymdardyń eldi mekenderge jaqyn ornalasqan 161,9 myń gektaryn qoǵamdyq jaıylym retinde aýyldyq okrýg ákimdikterine bekitiledi. Sondaı-aq 2026 jylǵa aýyl shaýrashylyǵy maqsatyndaǵy 146,5 myń gektar jerdi aınalymǵa engizý josparlanǵan.
