Foto: aikyn.kz
Spıkerdiń aıtýynsha, jeke bas bostandyǵy – barlyq quqyqtyń negizi jáne bul qaǵıdat Konstıtýsııada naqty tetiktermen bekitilýi tıis. Qazirgi qylmystyq proseste ýaqytsha ustaýdyń uzaqtyǵy adam quqyǵyna tikeleı qater tóndiredi. Mádı Myrzaǵaraev tehnologııalyq múmkindikterdi alǵa tarta otyryp, bul tájirıbeni túbegeıli qaıta qaraý qajettigin atap ótti.
«Ýaqytsha ustaý – bul tergeýdiń alǵashqy kezeńindegi májbúrli, aıryqsha shara. Biraq osy ýaqytsha sharanyń ózi meılinshe qysqa merzimge ǵana qoldanylýy tıis. Eń bastysy – sot qaraýyna tez arada jetkizý. Tehnologııalar damyǵan búgingi zamanda materıaldardy sotqa usyný úshin uzaq ýaqyttyń qajeti joq. Negizgi tergeý áreketteri alǵashqy táýlikte-aq atqarylady. Sot baqylaýyn erterek iske qosý azamatqa ǵana emes, memleketke de tıimdi. Sot sanksııasy – tergeý zańdylyǵynyń basty kepili jáne qoǵam seniminiń tiregi. Osy rette, halyqaralyq ozyq tájirıbeni eskere otyryp, Konstıtýsııada sot sanksııasynsyz ustaý merzimin 72 saǵattan 48 saǵatqa deıin qysqartýdy usynamyn», dedi Mádı Myrzaǵaraev.
Sonymen qatar, spıker halyqaralyq deńgeıde moıyndalǵan «Mıranda qaǵıdasy» – quqyqtyq memlekettiń myzǵymas ólshemi ekenin basa aıtty. Soǵan sáıkes, azamat óz quqyǵyn taǵdyry tarazyǵa túsken alǵashqy mınýttan bastap bilýge tıis. Al sol quqyqtardyń ishindegi eń mańyzdysy – kásibı advokattyń kómegine júginý quqyǵy. Sondyqtan M.Myrzaǵaraev óz sózinde advokatýra ınstıtýtynyń qazirgi quqyqtyq jaǵdaıyna toqtaldy. Ol Konstıtýsııada bilikti zań kómegine quqyq bekitilgenimen, sol kómekti qamtamasyz etetin negizgi ınstıtýttyń mátinde naqty atalmaǵanyn aıtty. Mádı Myrzaǵaraev Qazaqstanda advokatýranyń buryn Konstıtýsııalyq mártebesi bolǵanyn eske salyp, tarıhı olqylyqty qaıta jasamaýǵa shaqyrdy.
«Advokatýra – tek kásibı qaýymdastyq emes, quqyqtyq memlekettiń ajyramas tirek ınstıtýty. Dál osy ról onyń mártebesin jalpy zań deńgeıinde ǵana emes, Konstıtýsııa deńgeıinde tanýdyń tabıǵı qısyndylyǵyn kórsetedi. Qazaqstan aýmaǵynda advokatýranyń konstıtýsııalyq mártebesi buryn bolǵan. Táýelsizdiktiń alǵashqy jyldaryndaǵy reformalar barysynda advokatýranyń Ata Zań mátininen tys qalýy - tarıhı olqylyq. Nátıjesinde, Konstıtýsııada bilikti zań kómegine quqyq bekitilgenimen, sol kómekti tarıhı túrde kórsetip kele jatqan negizgi ınstıtýttyń ózi Konstıtýsııa mátininde atalmaı qaldy», dedi M.Myrzaǵaraev.
Sóz barysynda Mádı Myrzaǵaraev qazirgi konstıtýsııalyq reformany advokatýranyń mártebesin ornyna keltiretin tarıhı múmkindik dep atap ótti. Ol Konstıtýsııada advokatýranyń quqyqtyq mártebesin bekitý memlekettiń jarııalaǵan baǵytyna, Prezıdent aıqyndaǵan strategııalyq baǵdarǵa jáne qoǵamnyń suranysyna tolyq sáıkes keletinin basa aıtty.
