Úıirmeniń ashylý rásimi oblystyq Dostyq úıinde ótti. Atalǵan mádenı-sporttyq is-shara Memleket basshysy Qasym-Jomart Toqaevtyń 2025 jylǵy 29 jeltoqsandaǵy jarlyǵymen bekitilgen Qazaqstan halqy Assambleıasyn 2030 jylǵa deıin damytý tujyrymdamasynda kórsetilgen jastardyń oı-órisin keńeıtý jáne qoǵamdyq kelisimdi nyǵaıtý mindetteri aıasynda uıymdastyryldy.
Toǵyzqumalaq – halqymyzdyń sanǵasyrlyq oı-órisin damytqan zııatkerlik doda. Ol esepke júırik bolýdy, aldaǵy qadamdy aldyn ala saralaýdy jáne taktıkalyq utymdy sheshim qabyldaýdy qalyptastyratyn oıyn. Sonymen qatar toǵyzqumalaq – hakim Abaıdyń da súıikti oıyndarynyń biri. Bul týraly abaıtanýshylarmen qatar M.Áýezovtiń «Abaı joly» romanynda da kórinis beredi. Sondyqtan toǵyzqumalaq oıynynyń Abaı elinde damýy zańdy qubylys bolsa kerek.
Úıirmeni tájirıbeli jattyqtyrýshy Leonıd Parfıev júrgizedi. Ol toǵyzqumalaq oıynymen 2000 jyldan beri aınalysyp keledi.
– 2016 jyldan bastap sport mektebinde kásibı jattyqtyrýshy retinde jumys istedim. Keıingi jyldary shákirtterim halyqaralyq jarystarda joǵary nátıjelerge qol jetkizgen. Atap aıtqanda, byltyrǵy jyldyń qarasha aıynda Malıka Ásemhanova álem chempıony atandy, – dedi jattyqtyrýshy.
Ardagerler keńesiniń tóraǵasy Muratqazy Álın «toǵyzqumalaq oıyny jastar men balalardyń oılaý júıesin damytatyn mańyzdy qural», deıdi.
Jıynǵa Qazaqstan halqy Assambleıasynyń músheleri men etnomádenı birlestikterdiń ókilderi qatysty. Úıirmeniń ashylýyna qatysqan Ýlıana Abasheva:
– Oıyn barysynda qatysýshylar qarsylastyń árbir júrisin taldap, durys sheshim qabyldaýǵa, óz áreketterin aldyn ala josparlaýǵa úırenedi. Sabaq barysynda barsha qatysýshylar belsendilik tanytyp, oıynǵa degen úlken qyzyǵýshylyq kórsetti. Aldaǵy ýaqytta úıirme jumysyna turaqty túrde qatysyp, toǵyzqumalaq oıynyn tereńirek meńgerip, oıyn sheberligin jetildirgimiz keledi, – deıdi.
Uıymdastyrýshylardyń aıtýynsha, úıirmeniń basty maqsaty – ulttyq zııatkerlik oıyndardy keńinen nasıhattaý ǵana emes, sonymen qatar etnosaralyq tatýlyqty nyǵaıtyp, ortaq qyzyǵýshylyq negizinde jastardy biriktirý. Toǵyzqumalaq adal básekeni dáriptep qana qoımaı, jastardyń bir-birimen jaqyn aralasyp, ortaq iske uıysýyna múmkindik bermek.
Abaı oblysy
