Shahar maqtanyshyna aınalǵan qonaqúı

Shymkentte, álemdegi eń iri qonaq úılerdiń sanatyna kir­gen «Rixos Khadisha»-nyń saly­nýynyń jaqsy tarıhy bar. Qaısibir jyly «Rixos» Býrabaıda ashyldy. Tusaýkeserine Elbasynyń ózi qatysty. Sol alqaly jıynda Nursultan Ábish­uly «Serikjan, Shymkentti Qazaq­standaǵy úshinshi qalaǵa aınaldyryp jatyrmyz. Halqy mıllıonnan asatyn qalaǵa zaman talabyna jaýap beretin sáýletti qonaqúı kerek. Sen Shymkentke «Rixos» salsańshy», degen bolatyn. Sonda «Saýts-Oıl» kom­panııa­synyń prezıdenti Serikjan Seıitjanov «Nureke, salýǵa ýáde beremiz», degen. Seıitjanovtyń, bireýler oılaı­­tyndaı, býda-býda aqsha shyǵa­ratyn fabrıkasy joq. Úlken bankterden úlken kredıt alyp úlken salalarǵa ınvestısııa salyp jatyr. Qara altynnyń álemde bási túsip ketken. Álemdi áltek-táltek bastyrǵan qarjy daǵdarysy bes myń adamǵa jumys taýyp berip otyrǵan azamatty kórmeı qalyp, aınalyp ótti deýge bolmaıdy. Áıtse de, Elbasy tapsyrmasy oryn­dalýy kerek. «Táýekel et te tas jut» deıdi qazaq naqyly. Oblys ákimi Asqar Myrzahmetov «Rixos» qonaq úıiniń jobasyn Elbasyna baıandap, kelisimin alǵannan keıin Serikjan Seıitjanov úlken iske bel sheship kirisip ketken. Álemde «Rixos» brendin ıemdengen 30 shaqty ǵana qonaqúı bar. Al 400-den astam otel premer-lıýks sanatynda sanalady. Osylardyń arasynda úzdigin anyqtaý jyl saıyn bir ret ótkizilip turady. Bıyl Monte-Karloda ótken baıqaýda «Rixos Khadisha Shymkent» eń úzdik dep tanylǵan. Aqjoltaı habardy «Ońtústik» aqparat ortalyǵynda ótken brıfıngte qonaqúıdiń quryltaıshysy Serikjan Seıit­janov pen qonaq­úıdiń bas menedjeri Tomas Poll jetkizdi. Sáýletti qonaqúı 1,45 gektar jerdi alyp jatyr. Ǵımarat 12 qabattan turady. Standarttan bastap prezıdenttik dárejege deıingi 7 túrli sanattaǵy 177 demalys bólmesi bar. Birinshi qabatynda 750 adamǵa laıyqtalǵan, úlken saltanatty sharalarǵa jáne iskerlik qarym-qatynastarǵa arnalǵan 30-70 adamdyq eki zal jáne brendtik kıim-keshekter satylatyn dúkenderi bar. Ekinshi qabatta azııalyq «Pan Asian» jáne ıtalııalyq «L`Oliva» dep atalatyn eki meıramhana jumys jasaıdy. Eń tómengi qabatta, ıaǵnı jertólede SPA-ortalyq ornalasqan. SPA-ortalyq quramyna qar bólmesi, qurǵaq jáne dymqyl bý bólmeleri, saýna, fın monshasy, túrik hamamy, júzý basseıni, klassıkalyq, taılandtyq, úndis­tandyq jáne ystyq taspen jasaıtyn massaj bólmeleri bar. Sondaı-aq, emdeý-saýyqtyrý zaly, birneshe sulýlyq salondary meımandardy qabyldaıdy. Qonaqúıdiń qabyrǵasy men edeni Túrkııa, Italııa elderiniń mármár tastarymen aptalǵan. Qabyrǵalarǵa «Altyn adam» men Tomırıs patshaıymnyń altyn jalatylǵan músinderi or­natylǵan. Al mundaǵy jumsaq jıhazdardyń barlyǵy Italııada arnaıy tapsyryspen jasalǵan. Edenge parsy kilemderi tóselgen. О́te sapaly materıaldarmen jasalǵandyqtan jáne bes juldyzdy mártebesin ıelengendikten bul qonaqúı qyz­metiniń aqysy da halyqaralyq standarttarǵa saı belgilengen. Aıtqandaı, Hadısha kim dep suraıtyndarǵa jaýap, ol qonaq úı quryltaıshysynyń anasy. On bir balany qanattyǵa qaqtyrmaı, tumsyqtyǵa shoqyttyrmaı, joldaryna jastyq bolyp ósirgen, tileýi eldiń ústinde, aýzynan Allasy túspegen abzal ana edi. Jalpy, ata-ananyń, baýyrdyń qadirine jetýdi osy áýletten úırense bolar. – Qazaqstan  naryq tolqynynda jaǵalaýǵa shyǵyp qalmaı aman-esen kele jatsa áýeli Alla, sosyn Memleket basshysynyń eńbegi, – deıdi Serikjan Seıitjanov. –Dúnıeniń tóńkerilip soǵatynyn aldyn ala bilip, strategııalyq jos­parlar túzdi. Endi ózge memleketter Qazaqstannan úlgi, ónege alyp jatyr. Sonymen qatar, Nursultan Ábishuly jastarǵa zaman talabyna saı bilim berýdi memleket aldyna úlken maqsat etip qoıdy. О́ser eldiń erteńi úshin bilimdi urpaq kerek. Meniń de nemerelerim álemdegi úzdik ýnıversıtetterde bilim alýda. Qazir óz salańda myqty bolmasań jalǵan keýde, jalań qolmen tabysqa jete almaısyń. Qazaq myqty bolǵysy kelse, zııaly, dáýletti bolǵysy kelse balasynyń tárbıesin, bilimin jónge qoısyn dep tiler edim. Keshegi qarapaıym muǵalimniń uly, atanyń emes, eldiń azamatyna aınalǵan, Elbasynyń tapsyrmasyn qaltqysyz oryndap 5 myń adamǵa jumys taýyp berip otyrǵan kásipkerlerdiń ómirden túıgeni osy. Baqtııar TAIJAN, «Egemen Qazaqstan». Ońtústik Qazaqstan oblysy.