Qaharmandar týraly kórme

109 shyǵysqazaqstandyq Keńes Odaǵynyń Batyry týraly syr shertedi A.S.Pýshkın atyndaǵy oblystyq kitaphanada «Bizdiń erjúrek jer­les­terimiz» atty kór­me ashyldy. Atalǵan kórme Uly Otan soǵysynda erekshe er­lik kórsetip, Keńes Odaǵynyń Batyry ataǵyna ıe bolǵan 109 shyǵysqazaqstandyq qaharmanǵa arnaldy. Soǵystyń qan maıdan shebinde dańqqa bólengen, keleshek urpaq­tyń beıbit ómiri úshin janyn qıǵan keńestik jaýyngerler arasynda qazaqstandyqtardyń orny erekshe. Qazaqstannan maıdanǵa attanǵan 500-ge jýyq jaýynger men ofıser Keńes Odaǵynyń Batyry joǵary ataǵyna ıe bolsa, sol atalarymyzdyń ár besinshisi – Shyǵys óńirinen shyqqan batyrlar. Árıne, soǵysta erlik kórsetpegen, qasiret shekpegen otbasy elimizde kemde-kem. Degenmen, Qazaqstannan shyqqan Keńes Odaǵy Batyrlarynyń ishinde Shyǵys óńiriniń ózinen 109 jaýynger men ofıserdiń atalǵan ataqqa ıe bolýy erekshe qubylys. Uıymdastyrýshylardyń aıtýynsha, kórmege qoıylǵan materıaldardan shyǵysqazaqstandyq batyrlardyń qaısysy teńizshi, teńiz jaıaý áskeri, mergen, ushqysh bolǵany, olardyń qaı maıdanda qandaı urysqa kirgeni, qandaı erlik kórsetkeni týraly jan-jaqty ári tolyq málimet alýǵa bolady. Kórmege qoıylǵan kitaphana qoryndaǵy materıaldar Máskeý túbindegi, Stalıngrad, Kýrsk syndy surapyl shaıqastarda, Dnepr ózeninen ótýdegi, Ýkraınany, Lıtvany, Vengrııany, Polshany, Chehoslovakııany azat etý úshin bolǵan urystarda Keńes Odaǵynyń Batyry atanǵan jerlesterimizdiń esimderi men erlikterin jete tanýǵa jol ashady. Uly Otan soǵysynyń barlyq maıdandary men áskerı bólimshelerinde bizdiń jerlesterimiz shaıqasty. Brest qorǵany, Mınsk, Lenıngrad, Smolensk, Odessa, Sevastopol, Týla, Kıev... Bul tek jaýdyń jolyn bógegen bekinis-qalalar ǵana emes, júzdegen batyrdyń jankeshtilik pen dańqty erliginiń mejesi. Máskeý úshin shaıqasta Panfılov dıvızııasynyń dańqy, onyń quramynda bolǵan jerlesimiz Tólegen Toqtarovtyń aty ańyzǵa aınaldy. Stalıngrad túbindegi urysta 38-atqyshtar dıvızııasy (keıin – 73-gvardııalyq Stalıngrad dıvızııasy) qaharmandyǵymen kózge tústi. Dıvızııany basqarǵan jerlesimiz Ǵ.Safıýllın qaraýsyz qalǵan kóshe balasynan Keńes Armııasynyń komandırine deıingi qıly taǵdyrdy basynan ótkerdi. Dneprden ótý barysyndaǵy urystarda – 42, Ýkraınany azat etý jolynda 15 shyǵysqazaqstandyq Keńes Odaǵynyń Batyry ataǵyna ıe boldy. Glýbokoe aýdanynyń Bagratıonovka selosynda dúnıege kelgen kishi leıtenant V.Kolesnıkov KSRO men Germanııa arasyndaǵy memlekettik shekaraǵa alǵashqylardyń biri bolyp jetip, qyzyl tý tikti. Germanııanyń Zelov qalasyna alǵash kirgen keńestik kúshterdiń biri – kapıtan G.Boltaev basqarǵan gvardııa rotasy bolatyn. Berlınge shabýyldaýda 322-atqyshtar dıvızııasynyń saperler batalonynyń bólim komandıri, kishi serjant I.Sapalev, sonymen qatar N.Shelehov, P.Kolsov sııaqty jerlesterimiz erekshe kózge tústi. Sondaı-aq, óshpes dańq tuǵy­ryna kóterilgen jerlesterimiz jóninde kitaptar, fılmder men estelikter de tereń syr shertedi. Soǵystyń kúrkiregen ýaqytynan alystaǵan saıyn onyń adamzat tarıhyndaǵy alar orny da, mańyzy da, Otan qorǵaý jolyndaǵy dańq shejiresi de túgendelip, keler urpaqtyń jadynan oryn ala beretini daýsyz. Kórmeniń saltanatty ashylý rásimine soǵys jáne tyl ardagerleri, qoǵamdyq uıymdar ókilderi men stýdentter, oqýshylar qatysty. Dýman ANASh, «Egemen Qazaqstan». О́SKEMEN.