- Taıland astanasy — Bangkokte boks-tan 19 jasqa deıingi erler men qyzdar arasynda halyqaralyq týrnır ótip jatyr. Futures Cup dodasy bel ortasynan aýyp, jekpe-jekter qyza tústi. Erler arasynda Arman Mirsábıt grýzın Shalva Belıdzeni 2-raýndta tehnıkalyq nokaýtpen jeńip, kelesi kezeńge ótti. Qyzdar arasynda Jasmın Abramıan (60 kg) Polsha boksshysy Marııa Gorzelannany 4:1 esebimen eńserdi. О́kinishke qaraı, 51 kg salmaqta synǵa túsken Aıym Tańqybaeva ózbekstandyq Nazokat Mardonovaǵa ese jiberdi. Maral Tólepbergen (54 kg) úndistandyq Djoıshırı Devı Shıromnyń qarymyna tótep bere almaı, 3-raýndta jekpe-jek toqtatyldy. Asylaı Murat (48 kg) ózbekstandyq Maftýna Mýsýrmonovaǵa qarsy jekpe-jeginde jarystan shettetildi. О́zge qyz-jigitter týrnırdegi jekpe-jekterin jalǵastyrýda. Dúbirli doda 15 naýryzda máresine jetedi.
- Túrkııanyń Antalıa qalasynda sporttyq gımnastıkadan álem kýboginiń kezeńi bastaldy. Elimizdiń namysyn alty sportshy qorǵaıdy. Atap aıtqanda, Parıj jazǵy Olımpıadasynyń kúmis júldegeri Narıman Qurbanov, Zeınolla Ydyrysov, Roman Mamenov, Nurtan Ydyrysov, Dámeli Muqysheva, Amına Halımarden dodaǵa túsedi.
- Astanada semserlesýden álem kýboginiń kezeńi ótedi. El sportynyń tarıhynda tuńǵysh ret semserlesýdiń shpaga saıysynan jahandyq doda 26–29 naýryz aralyǵynda QAZAQSTAN jeńil atletıka sport kesheninde túńligin túredi. Jarysqa 96 elden 600-den astam sportshy qatysady dep kútilip otyr. Týrnırde júldeler erler, áıelder arasynda, sondaı-aq komandalyq sa-ıysta sarapqa salynady. Bul báseke – Halyqaralyq semserlesý federasııasy (FIE) kúntizbesine engen bedeldi dodanyń biri. Álem kýboginiń kezeńderin árdaıym Shveısarııa, Germanııa, BAÁ, Kanada elderi joǵary deńgeıde ótkizip júr. Bıyl dodany qabyldaý qurmeti elordaǵa buıyrdy. Halyqaralyq semserlesý federasııasynyń (FIE) álem kýboginiń bir kezeńin Astanada ótkizý týraly sheshimi kóp jaıtty ańǵartady. Buǵan deıin Ortalyq Azııa elderinde semserlesýden álem kýbogi týrnırleri ótken emes. Jarys barysynda ulttyq qurama sapynda Rýslan Qurbanov, Elmır Álimjanov, Erlik Sertaı, Kırıll Prohodov, Vadım Sharlaımov syndy sańlaqtar saıysqa túsedi.
