Teńiz jaǵasyndaǵy kásiporyn

Kaspıı teńizindegi óndiristik operasııalardy júzege asyrý ońaı is emes. Ondaǵy kúrdeli jumystyń kerek-jaraǵyn jaǵa­laýdan tasymaldap der kezinde jetkizip berý, vahtalyq aýysymdardy qamtamasyz etý óz aldyna, óndiris jumysyna qajetti eritindilerdi daıyndap jetkizý de aıryqsha mańyzǵa ıe. Qazir teńizben japsarlas ornalasqan Túpqaraǵan aýdanynyń ortaly­ǵy Ketik qalasynyń, onyń mańyn­daǵy úlkendi-kishili aýyl­dardyń janyn boılaı, teńiz jaǵalaı ornalasqan túrli mekemeler – otandyǵy bar, sheteldigi bar kásiporyndar men kompanııalardyń negizgi qyzmeti osy, ıaǵnı teńizdegi operasııalardy jaǵalaýdan qoldaý bolyp tabylady. Solardyń biri – oblys or­ta­lyǵy Aqtaý qalasynan 132 shaqyrym qashyqtyqta, ıaǵ­nı Túpqaraǵan aýdanynda ornalasqan «Qaz Em-Aı» («Em-Aı Drıllıng») kásiporny. Qazaqstannyń údemeli ındýs­trııa­lyq-ınnovasııalyq damý memlekettik baǵdarlamasyn jú­zege asyrý barysynda 2010 jyly aımaqtyq ındýstrııalandyrý kartasyna enip, bir jyldan soń tusaýy kesilgen quny 2250 mln. teńge turatyn joba qazir arada bes jyl ótkende óz jumysyn úıirip áketken irgeli mekemege aınaldy. Kaspıı teńiziniń qazaqstandyq sektoryndaǵy jumystardy júzege asyrý úshin burǵylaý eritindilerin daıyndaýmen aınalysatyn zaýytta qazir 30-ǵa tarta adam jumysqa tartylǵan. 9 myń sharshy metr­den astam aýmaqta eritindini daıyndaý qondyrǵysy, ony ýaqytsha saqtaý qoımasy syndy óndiris jumysyna qajetti ǵımarat-jabdyqtar ornalasqan jáne aımaq qajetti oryndarmen asfalt joldarmen baılanysqan. Mıneral jáne sý túrinde óndiristik qajettilikke jaratylatyn eritindiniń jylyna 84 myń tonnasyn daıyndaýdy josparlaǵan kásiporyn 2013 jyly jobalyq qýatynyń tek 23 paıyzyn ǵana ıgere aldy. Teńizdegi jumystar qarqyn alǵan sátte atalmysh kásiporynnyń jumys qýaty da eselene túspek. О́nimderine «Agip KCO» jáne «Jambyl Petroleým» JShS tapsyrys túsiretin kásiporynnyń ónimi – óndiris, burǵylaý sala­syndaǵy jumystar barysynda keń qoldanyla bermek. Ázirge jobalyq qýatyna tolyq enbegenmen, otandyq ónim óndirý­shiler qatarynan tabylǵan kásiporynnyń jumys kókjıegi keńeıe túsedi degen senim bar. Gúlaıym ShYNTEMIRQYZY, «Egemen Qazaqstan». Mańǵystaý oblysy.